လွေးထွေး၊ မေလ ၁၉ ရက်၊ ရွာငံ
ရှမ်းတောင် ရွာငံမြို့နယ်က ကျေးရွာတချို့မှာ စစ်ကောင်စီတပ်က ဒေသခံတွေကို ငွေတောင်းတာအပြင် စစ်ဆေးဖမ်းဆီးရိုက်နှက်နေသလို ဖုန်းတွေကိုလည်း သိမ်းဆည်နေကြောင်း ဓနုပြည်နယ်အမျိုးသား ကာကွယ်ရေးတပ်တော်- DSNDA ရဲ့ သတင်းနဲ့ပြန်ကြားရေးတာဝန်ခံ ကိုကျားပျံရဲ့ ပြောပြချက်အရ သိရပါတယ်။
ရွာငံမြို့နယ် နွားဘန်းကြီးရွာက လူထုတွေဟာ ၂၀၂၅ ခုနှစ် ပထမလကစပြီး မေလအထိ စစ်တပ်ထံ တစ်လကို တစ်အိမ် ၁ သောင်းကျပ် ပုံမှန်ပေးနေရပြီး ပြီးခဲ့တဲ့ မေလ ၄ ရက်ကလည်း ရွာခံတွေရဲ့ဖုန်း အလုံး ၂ ထောင်ကျော်ကို စစ်ဆေးသိမ်းဆည်းပြီး တစ်ပတ်အကြာမှ ပြန်ပေးခဲ့တာပဲ ဖြစ်ပါတယ်။
ကိုကျားပျံက “ကျနော်တို့ကတော့ ကျနော်တို့ပြည်သူကိုထိရင် ပိုနာတာပေါ့။ ဒီကောင်တွေက လူလိုပြောလို့လဲ နားလည်မှာ မဟုတ်တဲ့အတွက် သူတို့နဲ့ထိုက်တန်တာပဲ ပြန်ပေးရမှာပေါ့” လို့ ပြောပါတယ်။
ကျေးရွာအတွင်း စစ်ကောင်စီရဲ့ တပ်မ ၅၅ နဲ့ နယ်ခံ ပျူစောထီး၊ ရဲက အခြေချ တပ်စွဲထားတာကြောင့် တပ်အတွင်း လိုအပ်တာ လုပ်ဆောင်ဖို့ကိုလည်း ရွာခံတွေကို နေ့စဉ် ခေါ်ယူကာ လုပ်ဆောင်ခိုင်းတဲ့အပြင် ရွာအတွင်းက ကားတွေကိုလည်း အလှည့်ကျ ယူသုံးနေတယ်လို့ ဆိုပါတယ်။
ဒါ့အပြင် အရင်က ကောက်ခံထားတဲ့ငွေ သိန်း ၈၀ ကျော်ကလည်း စစ်ကြောင်းမှူးက နယ်ပြောင်းသွားတာကြောင့် နွားဘန်းကြီးရွာအပါအဝင် မျှားကလေး၊ အင်တော၊ လယ်ကိုင်းရွာ စတဲ့ကျေးရွာမှာလည်း ငွေကောက်ခံမှု တိုးမြှင့် ကောက်ခံသွားမယ်လို့လည်း စစ်တပ်က ဒေသခံတွေကို ပြောဆိုထားပါတယ်။
ပြီးခဲ့တဲ့ မေလ ၁၅ ရက်ကလည်း ရွာငံမြို့နယ် ဂွေးပင်နဲ့ တောင်ဦးရွာထဲ စစ်ကြောင်းထိုး ဝင်လာပြီး ရွာခံတွေကို စာသင်ကျောင်းထဲ ခေါ်စုထားချိန် နေအိမ်တွေကို မွှေနှောက်ခဲ့ပြီး ပစ္စည်းနဲ့ ရွှေ ငွေ ခိုးယူသွားတာအပြင် ရွာခံတွေကို ရိုက်နှက်နှိပ်စက်ခဲ့သေးတယ်လို့ ကိုကျားပျံရဲ့ ပြောပြချက်အရ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
