မြတ်နိုး၊ မေလ ၁၈ ရက်၊ ဖားကန့်
ကချင်ပြည်နယ် ဖားကန့်ဘက် စစ်ကြောင်း ထိုးလာနေတဲ့ ကပ်မှော်စွပ်ရောက် စစ်ကောင်စီတပ်ကို မနေ့ မေလ ၁၇ ရက်မှာ ကချင်တပ်မတော်- KIA နဲ့ ပူးပေါင်းတပ်ဖွဲ့က တိုက်ခိုက်ရှင်းလင်းခဲ့ကြောင်း ရှေ့တန်း သတင်းရင်းမြစ်တွေဆီက သိရပါတယ်။
“ကပ်မှော် ဘုန်းကြီးကျောင်းမှာ နေရာယူ စခန်းချပြီး ချက်စားနေချိန် KIA နဲ့ ပူးပေါင်းတပ်ဖွဲ့ဘက်က သွားတိုက်တာ” လို့ ရှေ့တန်း သတင်းရင်းမြစ်တစ်ဦးက ပြောပါတယ်။
အဲဒီ စစ်ကောင်စီတပ်ဟာ ရွာခံတွေရဲ့ အိမ်မွေးတိရစ္ဆာန်ကို ကြိုက်သလို သတ်ဖြတ်ချက်စားနေကြတယ်လို့ သူက ပြောပါတယ်။
“KIA နဲ့ ပူးပေါင်းတပ်ဖွဲ့က သွားတိုက်လို့ ကပ်မှော် ဘုန်းကြီးကျောင်းက စစ်ကောင်စီတပ်ဖွဲ့တွေ မနေ့ညနေပိုင်း ခွန်စိုင်ဇွပ်ဘက် ဝင်သွားပြီလို့ သိရတယ်” လို့ ရှေ့တန်းနဲ့ နီးစပ်သူတစ်ဦးကလည်း ပြောပါတယ်။
ဒီနေ့ မေလ ၁၈ ရက် မနက်ပိုင်းမှာတော့ ဖားကန့် တံတားညီနောင်ဘက် တိုက်ပွဲ ဖြစ်နေတယ်လို့ ကြားသိရကြောင်း ဒေသခံတစ်ဦးက ပြောပါတယ်။
ဖားကန့်လမ်းဘက် မနေ့ မေလ ၁၇ ရက်က လေယာဉ်နဲ့လည်း ဗုံး လာကြဲတယ်လို့ သူက ပြောပါတယ်။
လတ်တလောမှာ စစ်ကောင်စီတပ်က KIA နဲ့ ပူးပေါင်းတပ်ဖွဲ့တွေ သိမ်းပိုက်ထားတဲ့ ဖားကန့်လမ်းကြောင်း ပြန်လည် ထိန်းချုပ်နိုင်ဖို့ ပြီးခဲ့တဲ့ ဧပြီ လကုန်ပိုင်းကစ ဆက်တိုက် ထိုးစစ်ဆင်လာနေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
