မိုင်းရူပ၊ မေလ ၁၆ ရက်၊ ဖယ်ခုံ
ရှမ်းတောင်-ကရင်နီနယ်စပ် ဖယ်ခုံမြို့နယ် မိုးဗြဲမြို့သို့ အင်အား ၆၀၀ ကျော်အသုံးပြုပြီး ထိုးစစ်ဆင်လာတဲ့ စစ်ကောင်စီတပ်ဖွဲ့ဝင် ၂၀ ကျော်သေဆုံးခဲ့ကာ ၁၆ ဦးအလင်းဝင်ခဲ့တယ်လို့ တော်လှန်ရေးတပ်တွေဆီက သိရပါတယ်။
ပြီးခဲ့တဲ့ မေလ ၆ ရက်ကနေ ဒီနေ့ မေလ ၁၆ ရက်အထိ အင်အား ၆၀၀ ကျော်ရှိတဲ့ စစ်ကောင်စီတပ်နဲ့ ပအိုဝ်းပြည်သူ့စစ်-PNO တပ်တွေကို ရှမ်းတောင် ညောင်ရွှေနဲ့ ဖယ်ခုံမြို့နယ်အစပ်ရှိ ရေပူ၊ စွန့်စွဲနဲ့ လွယ်လုံကျေးရွာတွေမှာ တော်လှန်ရေးတပ်တွေဘက်က တိုက်ခိုက်ခဲ့တာဖြစ်ပါတယ်။
၁၀ ရက်ကြာတိုက်ပွဲအတွင်း စစ်ကောင်စီတပ်ဘက်က ၁၈ ဦးထက်မနည်းသေဆုံးခဲ့ပြီး စစ်ကောင်စီရဲ့ လက်နက်ခဲယမ်းတွေကိုလည်း သိမ်းဆည်းရမိခဲ့တယ်လို့ မိုးဗြဲတိုက်ပွဲမှာ ပါဝင်တိုက်ခိုက်နေတဲ့ ရှမ်းတောင်စစ်ဒေသခွဲ၊ PDFအမှတ် (၁)ဗျူဟာ သတင်းပြန်ကြားရေးတာဝန်ခံက ရွှေဖီမြေကို ပြော ပါတယ်။
” စကစဘက်က မိုးဗြဲကို ပြန်ထိန်းချုပ်ဖို့ ရေကြောင်း၊ မြေပြင်စစ်ကြောင်းတွေနဲ့ ထိုးစစ်ဆင်နေတာဖြစ်တယ်။ လက်ရှိအချိန်အထိတော့ တိုက်ပွဲတွေဆက်ဖြစ်နေတယ်” လို့ ဆိုပါတယ်။
တိုက်ပွဲအတွင်း တော်လှန်ရေးတပ်တွေဘက်က ၁ ဦးကျဆုံးပြီး ၂ ဦးဒဏ်ရာရကာ သေဆုံးမှုများတဲ့ စစ်ကောင်စီတပ်ဟာ စွန့်စွဲကျေးရွာရှိ နေအိမ် ၂၀ ကျော်ကို မီးရှို့ခဲ့တယ်လို့ ရှမ်းတောင်စစ်ဒေသခွဲ၊ PDFအမှတ်(၁)ဗျူဟာက ထုတ်ပြန်ထားပါတယ်။
စစ်ကောင်စီတပ်က မိုးဗြဲမြို့ကို ပြန်ထိန်းချုပ်ဖို့ စစ်ကြောင်း ၃ ကြောင်းအသုံးပြုကာ ထိုးစစ်ဆင်နေပြီး မေလ ၁၄ ရက်မှာလည်း မိုးဗြဲတိုက်ပွဲမှာ စစ်ကောင်စီဘက်က ၅ ဦးထက်မနည်းသေဆုံးခဲ့ကာ အဆိပ်ငွေ့ဗုံးတွေကိုပါ အသုံးပြုတိုက်ခိုက်ခဲ့တယ်လို့ ဆိုပါတယ်။
စစ်ကောင်စီတပ်ဘက်ကတော့ မိုးဗြဲတိုက်ပွဲနဲ့ ပတ်သက်ပြီး သတင်းထုတ်ပြန်ထားတာ မရှိသေးပါဘူး။
မိုးဗြဲမြို့ရဲ့ နေရာအများစုကို ကရင်နီတော်လှန်ရေးအင်အားစုတွေက ထိန်းချုပ်နိုင်ခဲ့ပေမဲ့ မိုးဗြဲမြို့အနီးမှာ စစ်ကောင်စီရဲ့ ခြေမြန်တပ်ရင်း-၄၂၂ တပ်ကျန်ရှိနေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
