မိုင်းပန်ပျော်၊ မေလ ၁၆ ရက်၊ လားရှိုး
တရုတ်အကူအညီနဲ့ ရှမ်းမြောက် လားရှိုးမြို့ကို ပြန်လည်ထိန်းချုပ်ထားတဲ့ စစ်ကောင်စီတပ်က ရပ်ကွက်အုပ်ချုပ်ရေးမှူးအဟောင်းတွေကို ခေါ်တွေ့ပြီး အစည်းအဝေးလုပ်ခဲ့တယ်လို့ ဒေသခံတွေဆီက စုံစမ်းသိရှိရပါတယ်။
ပြီးခဲ့တဲ့ မေလ ၁၄ ရက်မှာ ၁၀၂၇ စစ်ဆင်ရေး မတိုင်ခင်က ရပ်ကွက်အုပ်ချုပ်ရေးမှူး တာဝန်ထမ်းဆောင်ခဲ့တဲ့ လူတွေကို ခေါ်တွေ့ပြီး အစည်းအဝေး လုပ်ခဲ့တာလို့ လားရှိုးဒေသခံအမျိုးသားတစ်ဦးက ရွှေဖီမြေကို ပြောပါတယ်။
“မြို့သိမ်းတိုက်ပွဲမဖြစ်ခင်ကတည်းက လုပ်ငန်းတွေတာဝန်ထမ်းဆောင်ခဲ့တဲ့ နယ်မြေမှူးတွေ ရာအိမ်မှူးတွေ ရပ်ကွက်အုပ်ချုပ်ရေးမှူးတွေ အစည်းအဝေးပြန်ခေါ်တယ်။ ဒီရပ်ကွက်အုပ်ချုပ်ရေးမှူးလိုင်းတွေ ပြန်လည်ပတ်မယ်လို့တော့ ကြားတယ်”
အခုလို စစ်ကောင်စီတပ်က ရပ်ကွက်အုပ်ချုပ်ရေးမှူးအဟောင်းတွေကို ပြန်ခန့်ရင် တပ်သားသစ်တွေ စုဆောင်းလာမှာကို ဒေသခံတွေက စိုးရိမ်နေကြပါတယ်။
ကိုးကန့်တပ်ထိန်းချုပ်စဉ်က ခန့်အပ်ခဲ့တဲ့ အုပ်ချုပ်ရေးမှူးနဲ့ ရာအိမ်မှူးတွေဟာ အလုပ်ကနေ ရပ်နားထားကြပြီး စစ်ကောင်စီတပ်ကတော့ သူတို့အုပ်ချုပ်စဉ်ခဲ့စဉ်က တာဝန်ထမ်းဆောင်ခဲ့သူတွေကိုသာ အလုပ်ပြန်လည်ခန့်အပ်မယ့် သဘောရှိနေပါတယ်။
စစ်ကောင်စီတပ်ဟာ ပြီးခဲ့တဲ့ ဧပြီလ ၂၂ ရက်မှာ တရုတ်ရဲ့ အကူအညီနဲ့ သေနတ်ဖောက်စရာမလိုဘဲ လားရှိုးမြို့ကို ပြန်လည်ထိန်းချုပ်နိုင်ခဲ့ပြီး အခုထိအုပ်ချုပ်ရေးယန္တရားလုပ်ငန်းအနည်းစုသာ လည်ပတ်နိုင်တာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
