ပို့လဘား၊ မေလ ၁၂ ရက်၊ မူဆယ်
စစ်ကောင်စီထိန်းချုပ်ထားတဲ့ တရုတ်-မြန်မာ နယ်စပ်ဖြစ်တဲ့ ရှမ်းမြောက် မူဆယ်မြို့မှာ သူခိုးနှစ်ဦးကို ဒေသခံတွေက ဖမ်းဆီးမိခဲ့တယ်လို့ ဒေသခံတွေက ပြောပါတယ်။
ပြီးခဲ့တဲ့ မေလ ၅ ရက်မှာ မူဆယ်မြို့ သိန်းသန်းချီ ကားကြီးဝင်းထဲမှာ အမျိုးသားနှစ်ဦးက ဆိုင်ကယ်ခိုးဖို့ လုပ်နေချိန်မှာ ဒေသခံတွေက ဖမ်းဆီးမိခဲ့တာဖြစ်တယ်လို့ ဒေသခံအမျိုးသားတစ်ဦးက ပြောပါတယ်။
“သူတို့နှစ်ယောက်ကို မသင်္ကာလို့ဆိုပြီး သွားကြည့်တယ်။ အဲအချိန်မှာပဲ သူတို့နှစ်ယောက် ခိုးဖို့လုပ်နေကြတာ။ အဲအနီးအနားမှာရှိတဲ့ ဈေးရောင်းနေတဲ့သူတွေက ဝိုင်းဝန်းပြီး သူတို့နှစ်ယောက်ကို ဖမ်းထားတယ်။ ပြီးတော့ သူတို့နှစ်ယောက်ကို မှတ်သားလောက်တဲ့အထိ ဝိုင်းရိုက်ကြတာပေါ့။ အခုရဲစခန်းမှာ ပို့လိုက်ပြီ”
အဆိုပါအမျိုးသား ၂ ဦးဟာ ရန်ကုန်မြို့ဒေသခံတွေဖြစ်ကြပြီး မူဆယ်မြို့မှာ အလုပ်လာလုပ်ကြတဲ့သူတွေ ဖြစ်တယ်လို့ အဆိုပါအမျိုးသားက ပြောပါတယ်။
မူဆယ်မြို့မှာ တစ်ပတ်ကျော်အတွင်း လုယက်မှု၊ ဓားပြတိုက်မှုနဲ့ ပြန်ပေးဆွဲမှု ၄ ကြိမ်ထက်မနည်း ဖြစ်ပွားခဲ့တယ်လို့ ပြောပါတယ်။
စစ်တပ်အာဏာသိမ်းပြီးနောက် မူဆယ်မြို့မှာ မူးယစ်ဆေးဝါး ရောင်းဝယ်သုံးစွဲသူနဲ့ လောင်းကစားဝိုင်းဟာ အရင်ကထက် များလာပြီး ခိုးမှု၊ လုယက်မှုနဲ့ ဓားပြတိုက်မှုတွေလည်း မကြာခဏ ဖြစ်ပွားနေတဲ့ နယ်စပ်မြို့ဖြစ်ပါတယ်။
