မိုင်းရူပ၊ မေလ ၆ ရက်၊ နောင်ချို
ရှမ်းမြောက် နောင်ချိုမြို့နယ်ထဲက စစ်ကောင်စီရဲ့ အမြှောက်တပ်တွေ တည်ရှိရာ တောင်းခမ်းရွာမှာ စစ်တပ်နဲ့ တအာင်းတပ်မတော်- TNLA တို့အကြား တိုက်ပွဲ ဆက်ဖြစ်နေပြီး စစ်ကောင်စီတပ်က အဆိပ်ငွေ့ဗုံးတွေ ဆက်တိုက် အသုံးပြုတိုက်ခိုက်နေပါတယ်။
တိုက်ပွဲဟာ တောင်းခမ်းရှိ စစ်ကောင်စီရဲ့ အမြှောက်တပ်စခန်း ကွပ်ကဲမှုဌာနချုပ် ၉၀၂ တပ်စခန်းမှာ ဖြစ်ပွားနေပြီး နောင်လင်ရွာမှာတော့ စစ်တပ်က အဆိပ်ငွေ့ဗုံး ၆ လုံး ကြဲချတိုက်ခိုက်ခဲ့တယ်လို့ ရှေ့တန်းသတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“တိုက်ပွဲက ၉၀၂ တပ်မှာ ဖြစ်နေတယ်။ မနေ့ညနေပိုင်းအထိ တိုက်ပွဲ ပြင်းထန်နေတယ်။ နောင်လင်မှာတော့ မြေပြင်မှာ တိုက်ပွဲ မရှိဘူး။ စစ်ကောင်စီက လက်နက်ကြီးနဲ့ ပစ်တာတော့ ရှိတယ်။ မနေ့(မေလ ၅ ရက်) နောင်လင်ရွာမှာ အဆိပ်ငွေ့ဗုံး ၆ လုံး လာကြဲတယ်”
တအာင်းတပ် ထိန်းချုပ်ထားတဲ့ နောင်ချိုမြို့အနီး နောင်လင်ရွာကို ရောက်လာတဲ့ စစ်တပ်ဟာ နောင်လင်ရွာ ဘုန်ကြီးကျောင်းနဲ့ စာသင်ကျောင်းမှာသာ ထိန်းချုပ်နိုင်သေးတယ်လို့ သိရပါတယ်။
စစ်တပ်ဟာ လက်လွှတ်ထားရတဲ့ နောင်ချိုမြို့ကို ပြန်ထိန်းချုပ်ဖို့ တောင်းခမ်းနဲ့ အုမ္မတီးဘက်ကနေ ထိုးစစ်ဆင် တိုက်ခိုက်နေတာ ဖြစ်ပါတယ်။
ပြီးခဲတဲ့ ဧပြီ ၂၈ ရက်နဲ့ ၂၉ ရက်မှာ တရုတ်နိုင်ငံရဲ့ ကြားဝင်စေ့စပ်မှုကြောင့် စစ်ကောင်စီနဲ့ PSLF/TNLA တို့အကြား တရုတ်နိုင်ငံ ကူမင်းမြို့မှာ အပစ်ရပ်ရေး ဆွေးနွေးခဲ့ပြီးနောက် တအာင်းတပ် ထိန်းချုပ်ထားတဲ့ နောင်ချို၊ ကျောက်မဲ၊ သီပေါ၊ မိုးကုတ်၊ မိုးမိတ်ကနေ ဆုတ်ပေးဖို့ စစ်ကောင်စီက တောင်းဆိုခဲ့ပါတယ်။
စစ်ကောင်စီရဲ့ တောင်းဆိုချက်ကို တအာင်းတပ်က လက်မခံတာကြောင့် တအာင်းတပ် ထိန်းချုပ်ထားတဲ့ နောင်ချို၊ ကျောက်မဲ၊ မိုးကုတ်မြို့နယ်ကို စစ်တပ်က လေကြောင်း တိုက်ခိုက်မှု ၁၀ ကြိမ်အထိ ပြုလုပ်ခဲ့ရာ အရပ်သား ၁ ဦး သေဆုံးပြီးတော့ ၄ ဦး ဒဏ်ရာ ရခဲ့ပါတယ်။
PSLF/TNLA ရဲ့ အထွေထွေ အတွင်းရေးမှူး(၂) ဗိုလ်မှူးကြီး တားပန်လကတော့ ဆွေးနွေးပွဲမှာ နှစ်ဖက်သဘောတူညီမှု မရမချင်း တိုက်ပွဲ ဆက်ဖြစ်နေမှာဖြစ်ပြီး လူထုတွေအနေနဲ့ စစ်ရေးသတိ ရှိကြဖို့ တိုက်တွန်းထားပါတယ်။
