ခိုင်လေး၊ မေလ ၆ ရက်၊ ကျောက်မဲ
တအာင်းတပ်မတော် TNLA ထိန်းချုပ်ထားတဲ့ ကျောက်မဲခရိုင် မိုင်းငေါ့မြို့နယ်ထဲက ကွန်စလန်းရွာအစပ်ကို စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်ခဲ့ပါတယ်။
မနေ့ မေလ ၅ ရက် ည ၉ နာရီ ဝန်းကျင်လောက်မှာ ကွန်စလမ်းရွာအစပ်ကို ဗုံးနှစ်လုံးကြဲချတိုက်ခိုက်ခဲ့တာဖြစ်တယ်လို့ မြေပြင်အခြေအနေသိရှိသူတစ်ဦးက ရွှေဖီမြေကိုပြောပါတယ်။
”ဗုံးကတော့ ကွန်စလမ်းရွာအစပ်ကြားမှာ ကျတာ။ အဲမှာ ချုံထဲကျသွားတယ်။ လူထိခိုက်တာတော့မရှိဘူး။ ပေါင်ဘယ်လောက်လဲတော့ မသိရဘူး”
မနေ့ မနက်ပိုင်း ၁၁ နာရီ ဝန်းကျင်ကလည်း ကျောက်မဲမြို့ရှိ အမြာက်တပ်ထဲကို စစ်ကောင်စီတပ်က လေကြောင်းနဲ့ ဗုံးသီးနှစ်လုံး လာရောက်ကြဲချ တိုက်ခိုက်ခဲ့ပါတယ်။
စစ်ကောင်စီနဲ့ တအာင်းတပ်မတော်တို့ တရုတ်နိုင်ငံ ကူမင်းမြို့မှာ တွေ့ဆုံပြီး ဆွေးနွေးမှု ပျက်ပြီးနောက် စစ်တပ်က တအာင်းတပ်မတော် ထိန်းချုပ်ဒေသ မိုးကုတ်၊ ကျောက်မဲ၊ နောင်ချိုမြို့နယ်ထဲ လေကြောင်းတိုက်ခိုက်မှု ပိုလုပ်လာနေတာ ဖြစ်ပါတယ်။
