မိုင်းပန်ပျော်၊ မေလ ၃ ရက်၊ လားရှိုး
ရှမ်းမြောက် လားရှိုးမြို့နယ် အီနိုင်းရွာက အမျိုးသားတစ်ဦးဟာ နမ့်ဆန်မြို့နယ်ဘက် ရှိနေတဲ့ ဇနီးဖြစ်သူဆီ အလည်သွားရင်း လမ်းမှာ ၁၂ ရက်ကြာတဲ့အထိ ပျောက်ဆုံးနေပါတယ်။
ပြီးခဲ့တဲ့ မတ်လ ၂၂ ရက်မှာ အီနိုင်းရွာက ကိုရန့်တီဟာ နမ့်ဆန်မြို့နယ် အထက်မန်ဝဲရွာဘက် သွားရာကနေ လမ်းမှာပျောက်ဆုံးခဲ့ပြီး ဒီနေ့ မေလ ၃ ရက်အထိ အဆက်အသွယ် မရဘူးလို့ ကိုရန့်တီရဲ့ ညီမဖြစ်သူက ရွှေဖီမြေကို ပြောပါတယ်။
“သူက ၂၂ ရက်နေ့တုန်း သူ့မိန်းမဆီသွားတာ။ သူ့မိန်းမက အဲဒီနမ့်ဆန်ဖက်က အထက်မန်ဝဲကျေးရွာမှာ နေတယ်။ သူသွားကတည်းက အဆက်အသွယ်လည်း မရဘူး သူ့မိန်းမဆီလည်း မရောက်ဘူး။ တွေ့မိတဲ့လူရှိရင် ပြောပေးပါအုံး”
အီနိုင်းရွာကနေ အထက်မန်ဝဲရွာဘက်သွားတဲ့ လမ်းခရီးဟာ ကား၊ ဆိုင်ကယ်နဲ့ ပုံမှန် ၃ နာရီကျော်သာ မောင်းရပြီး ကိုရန့်တီဟာ ၁၂ ရက်ကြာတဲ့အထိ မိန်းမဖြစ်သူဆီ မရောက်သလို အဆက်အသွယ်မရဘဲ ပျောက်ဆုံးနေတယ်လို့ ၎င်းရဲ့ ညီမဖြစ်သူက ပြောပါတယ်။
ကိုရန့်တီဟာ အသက် ၃၄ နှစ်ရှိပြီး လားရှိုးမြို့နယ် အီနိုင်းရွာမှာ နေထိုင်တဲ့ တရုတ်လူမျိုးတစ်ဦး ဖြစ်တယ်လို့ သူမက ဆက်ပြောပါတယ်။
ကိုရန့်တီကို တွေ့မိတဲ့သူအနေနဲ့ ညီမဖြစ်သူရဲ့ဖုန်း 09-681 989 513 သို့ ဆက်သွယ်ပေးဖို့ တောင်းဆိုထားပါတယ်။
