ရွှေဖီမြေ၊ မေလ ၂ ရက်
တရုတ်ကြားဝင်စေ့စပ်မှုကြောင့် စစ်ကောင်စီတပ်နဲ့ တအာင်းအမျိုးသားလွတ်မြောက်ရေးတပ်မတော် (PSLF/TNLA) တို့ တရုတ်ပြည် ကူမင်းမှာ ပြုလုပ်တဲ့ အပစ်ခတ်ရပ်စဲရေး ဆွေးနွေးပွဲ အောင်မြင်မှုမရှိပဲ ပြီးဆုံးသွားခဲ့တယ်လို့ TNLA က ဒီနေ့ မေလ ၂ ရက်မှာ ထုတ်ပြန်ထားပါတယ်။
ဆွေးနွေးပွဲကို ပြီးခဲ့တဲ့ ဧပြီ ၂၈ နဲ့ ၂၉ ရက်မှာ ပြုလုပ်ခဲ့ပြီး ဆွေးနွေးပွဲမှာ စစ်ကောင်စီတပ်က လက်ရှိ TNLA ထိန်းချုပ်ထားတဲ့ နောင်ချို၊ ကျောက်မဲ၊ သီပေါ၊ မိုးကုတ်၊ မိုးမိတ်ကနေ ပလောင်ကိုယ်ပိုင်အုပ်ချုပ်ခွင့်ရဒေသ နမ့်ဆန်မြို့နယ်နဲ့ မန်တုံမြို့နယ် အတွင်းသို့ ပြန်လည်ဆုတ်ခွါပေးဖို့ တောင်းဆိုခဲ့တယ်လို့ ဆိုပါတယ်။
စစ်ကောင်စီတပ်ရဲ့ တောင်းဆိုမှုကို TNLA က လက်မခံနိုင်တာကြောင့် ဆွေးနွေးမှုမအောင်မြင်ပဲ လာမယ့်ဩဂုတ်လမှာ နှစ်ဖက်တွေ့ဆုံမှု ပြုလုပ်သွားမယ်လို့ ထုတ်ပြန်ထားပါတယ်။
ဆွေးနွေးပွဲကို TNLA ရဲ့ ဒုတိယဗိုလ်ချုပ်ကြီး တားဂျုတ်ဂျား ဦးဆောင်တဲ့ ကိုယ်စားလှယ်နဲ့ စစ်ကောင်စီတပ်မှ ဒုတိယဗိုလ်ချုပ်ကြီး ကိုကိုဦး ဦးဆောင်တဲ့ ကိုယ်စားလှယ်တို့ တက်ရောက်ခဲ့ကြပါတယ်။
တရုတ်နိုင်ငံအထူးကိုယ်စားလှယ် မစ္စတာတိန့်ရှီကျွင်းမှ ကမကထပြုပြီး TNLA ထိန်းချုပ်ဒေသမှာ လေကြောင်းနဲ့ ဗုံးကြဲတာ၊ လက်နက်ကြီးများပစ်ခတ်တာ၊ ဒရုန်းနဲ့ တိုက်ခိုက်တာနဲ့ ထိုးစစ်ဆင်တာ တွေရပ်တန့်ဖို့၊ တရုတ်-မြန်မာနယ်စပ်ကုန်သွယ်ရေးလမ်းကြောင်းပြန်လည်ဖွင့်လှစ်နိုင်ဖို့နဲ့ ဒေသတည်ငြိမ်အေးချမ်းစေဖို့နဲ့ ကိုးကန့်တပ်ဖွဲ့ MNDAAကဲ့သို့ တစ်ဆင့်တိုး အပစ်ခတ်ရပ်စဲရေးပြုလုပ်နိုင်ရန်အတွက် နှစ်ဖက်တွေ့ဆုံခဲ့တာလို့ ဆိုပါတယ်။
