မိုင်းရူပ၊ ဧပြီ ၂၉ ရက်၊ နောင်ချို
ရှမ်းမြောက် နောင်ချိုမြို့နယ် တောင်းခမ်းကျေးရွာမှာ စစ်ကောင်စီတပ်နဲ့ တအာင်းတပ် TNLA တို့အကြား တိုက်ပွဲဆက်လက်ပြင်းထန်နေပြီး စစ်ကောင်စီတပ်ဘက်က အဆိပ်ငွေ့ဗုံး ဆက်တိုက်အသုံးပြုနေတယ်လို့ ရှေ့တန်းသတင်းအရင်းအမြစ်တွေက ပြောပါတယ်။
ဒီနေ့ ဧပြီ ၂၉ ရက်မှာ တောင်းခမ်းရှိ စစ်ကောင်စီရဲ့ အမြောက်တပ်စခန်းကွပ်ကဲမှုဌာနချုပ် – ၉၀၂ မှာ တိုက်ပွဲပြင်းထန်နေပြီး စစ်ကောင်စီတပ်ဖက်က အဆိပ်ငွေ့ဗုံး ၁၁ လုံးနဲ့ လက်နက်ကြီး ၂၆ လုံး ပစ်ခတ်တိုက်ခဲ့တယ်လို့ TNLA က ထုတ်ပြန်ပြောဆိုပါတယ်။
“တောင်းခမ်းမှာ တိုက်ပွဲဆက် ဖြစ်နေတယ်။ ဒီနေ့က ၉၀၂ မှာ ဖြစ်နေတာ။ စစ်ကောင်စီက လက်နက်ကြီးနဲ့ ဆက်တိုက်ပစ်နေတယ်” လို့ ရှေ့တန်းသတင်းအရင်းအမြစ်တစ်ဦးက ရွှေဖီမြေကို ပြောပါတယ်။
TNLA ထိန်းချုပ်ထားတဲ့ နောင်ချိုမြို့အနီး နောင်လင်ရွာကို ရောက်လာတဲ့ စစ်ကောင်စီစစ်ကြောင်းကတော့ နောင်လင်ရွာရဲ့ ဘုန်းကြီးကျောင်းနဲ့ စာသင်ကျောင်းနေရာတွေကိုသာ ထိန်းချုပ်နိုင်ပြီး ဒီနေ့မှာ လက်နက်ကြီးနဲ့ ပစ်ခတ်တာတွေ ပြုလုပ်နေတယ်လို့ သူက ဆက်ပြောပါတယ်။
စစ်ကောင်စီတပ်ဟာ ၎င်းလက်လွတ်ထားရတဲ့ နောင်ချိုမြို့ကို ပြန်ထိန်းချုပ်ဖို့ တောင်းခမ်းနဲ့ အုမ္မတီးဘက်ကနေ ထိုးစစ်ဆင်တိုက်ခိုက်နေပြီး တိုက်ပွဲတွေ ဆက်လက်ပြင်းထန်နေပါတယ်။
ဒါ့အပြင် စစ်ကောင်စီတပ်ဟာ TNLA ထိန်းချုပ်ရာကို လေကြောင်းအသုံးပြုပြီး ဗုံးကြဲတာတွေ ဆက်လုပ်နေပြီး ပြီးခဲ့တဲ့ ဧပြီ ၂၇ ရက်မှာလည်း စစ်ကောင်စီတပ်က နောင်ချိုမြို့နယ် သစ်စက်ကျေးရွာကို ဂျက်လေယာဥ်နဲ့ ဗုံး ၂ လုံး ကြဲချတိုက်ခိုက်ခဲ့တာကြောင့် အမျိုးသမီး ၂ ဦးအပါအဝင် နေအိမ်အချို့ ထိခိုက်ပျက်စီးခဲ့ပါတယ်။
စစ်ကောင်စီတပ်ဟာ ဧပြီ ၃၀ ရက်အထိ ထပ်မံသက်တမ်းတိုးလိုက်ကြောင်း ပြောထားပေမယ့် တော်လှန်ရေးတပ်တွေ ထိန်းချုပ်ထားတဲ့ ဒေသတွေကိုတော့ လေကြောင်းနဲ့ တိုက်ခိုက်တာ ထိုးစစ်ဆင်တာတွေ ဆက်တိုက်လုပ်ဆောင်နေပါတယ်။
