အိုက်ပွီး၊ ဧပြီလ ၂၇ ရက်၊ ကလေး
စစ်ကိုင်းတိုင်း၊ ကလေးမြို့နယ်မှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ၂ရက်အတွင်း အရပ်သား ၄ ဦး သေဆုံးခဲ့တယ်လို့ ဒေသခံတွေက ရွှေဖီမြေကို ပြောပါတယ်။
ဒီနေ့ ဧပြီလ ၂၇ ရက်နေ့၊ မနက် ၈ နာရီ ၃၀ မိနစ်အချိန်မှာ ကလေးမြို့နယ်တောင်ပိုင်း၊ အောင်ချမ်းသာကျေးရွာနဲ့ ငါးဖားကျေးရွာ အနီးအနားတဝိုက်ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့ပြီး အရပ်သားတစ်ဦး သေဆုံးခဲ့ပါတယ်။
“ဗုံးအလုံးအရေအများပြားနဲ့ ကျေးရွာအနီးအနားဝန်းကျင်မှာ အတွဲလိုက် အဆက်မပြတ် ဗုံးကြဲသွားတာပါ။ အဲမှာ ပြည်သူတစ်ဦးသေတယ်။ ရွာက နွားတွေ ထိခိုက်သေဆုံးတယ်။”လို့ ကလေးမြို့နယ်ဒေသခံတစ်ဦးက ရွှေဖီမြေသို့ ပြောပါတယ်။
ဒါ့အပြင် မနေ့ ဧပြီလ ၂၆ နေ့ညနေကလည်း ကလေးမြို့နယ်၊ နတ်ချောင်းကျေးရွာနဲ့ နတ်မြောင်းကျေးရွာတို့ကို ဂျက်ဖိုက်တာ၊ Y12 လေယာဥ်တို့နဲ့ လေကြောင်း ဗုံးကြဲတိုက်ခိုက်လို့ အရပ်သား ၃ ဦး သေဆုံးခဲ့ပြီး ၅ ဦး ထက်မနည်း ဒဏ်ရာရရှိခဲ့ပါတယ်။
“လေယာဥ်နှစ်စီးနဲ့ ရွာကို ပတ်ပြီး ဗုံးအလုံးအရေ ၃၀ ကျော်နဲ့ ဗုံးကြဲသွားတယ်။ နတ်ချောင်းရွာက အရပ်သား ထိခိုက်သေဆုံးမှုများတယ်။ နေအိမ်တွေလည်း ပျက်စီးတယ်။ ရွာအခြေအနေ အသေးစိတ် မသိရသေးဘူး။ ဒီထက် ထိခိုက်မှုများနိုင်တယ်။”လို့ ကလေးမြို့နယ်ဒေသခံတစ်ဦးက ရွှေဖီမြေကို ပြောပါတယ်။
စစ်ကောင်စီ လေကြောင်း ဗုံးကြဲတိုက်ခိုက်တဲ့ ကျေးရွာတွေဟာ မြေပြင်မှာ တိုက်ပွဲမရှိဘဲ စစ်ကောင်စီက ယာယီပစ်ခတ်တိုက်ခိုက်မှုရပ်စဲရေးကာလမှာ အရပ်သားတွေနေထိုင်တဲ့ကျေးရွာတွေကို လေကြောင်း ဗုံးကြဲတိုက်ခိုက်ခဲ့တာ ဖြစ်ပါတယ်။
ဒါ့အပြင် စစ်ကောင်စီနဲ့ ပျူစောထီးတွေဟာ ၎င်းတို့လက်လွတ်ဆုံးရှုံးလိုက်ရတဲ့ ကလေး-ဂန့်ဂေါ ကားလမ်းက ပျူရွာတွေနဲ့ စခန်းတွေကို ပြန်ရဖို့အတွက် အခုရက်ပိုင်း အင်အားအလုံးရင်းနဲ့ ပြန်လည် ထိုးစစ်ဆင်နေတယ်လို့ ဒေသခံတွေဆီက သိရပါတယ်။
