မိုင်းအရှိုင်း၊ ဧပြီ ၂၇ ရက်၊ မူဆယ်
ညီနောင်မဟာမိတ်(၃)ဖွဲ့ ပူးပေါင်းထိန်းချုပ်ထားတဲ့ မူဆယ်မြို့နယ် ၁၀၅ မိုင်မှာ စစ်ယူနီဖောင်းဝတ်ဆင်တဲ့ တရုတ်စကားပြောသူ ၃ ဦးက ကားတစ်စီးကို ဓားပြတိုက်ခဲ့ပြီး အဲဓားပြသူတွေကို ညီနောင်မဟာမိတ်အဖွဲ့တွေက အချိန်မှီ ဖမ်းဆီးနိုင်ခဲ့တယ်လို့ သတင်းရင်းမြစ်ထံသိရပါတယ်။
ဖြစ်စဉ်က မနေ့ ဧပြီ ၂၆ ရက် မနက်ပိုင်း ၇ နာရီအချိန်မှာ စစ်ယူနီဖောင်းနဲ့ သေနက်ကိုင်ဆောင်ထားတဲ့ လူသုံးဦးဟာ ၁၀၅ မိုင် နယ်မြေ ၅ ထဲက Honda Fit ကားတစ်စီးကို ဓားပြတိုက်ခဲ့တာ ဖြစ်ပါတယ်။
“ယူနီဖောင်းက TNLA ပျောက်ကျားပုံစံနဲ့တော့ နည်းနည်းတူတယ်။ ဒါပေမဲ့ ဘက်တံဆိပ်မမြင်ရဘူး။ အပြင်အင်္ကျီတွေလည်း ဝတ်ထားတော့လေ” လို့ ဓားပြတိုက်မှုကြုံရသူတစ်ဦးက ဆိုပါတယ်။
ဓားပြတိုက်သူတွေထဲက တစ်ဦးဟာ ယူနီဖောင်းနဲ့ သေနတ်အရှည်ကိုင်ဆောင်ပြီး ကျန်တစ်ယောက်က အရပ်ဝတ်နဲ့ ပစ္စတို၊ နောက်တစ်ဦးက အရပ်ဝတ်နဲ့ဖြစ်ပြီးသေနတ်တော့ မပါဘူးလို့ သိရပါတယ်။
ဓားပြတိုက်မှုဖြစ်ပြီး ၅ နာရီအကြာမှာ ကားကို ညီနောင်မဟာမိတ်တပ်တွေဖြစ်တဲ့ AA, TNLA , MNDAA တပ်တို့က ကားကို ပြန်လာအပ်လိုက်တယ်လို့ သူက ဆက်ဆိုပြီး ဓားပြတွေကိုတော့ မဟာမိတ်တပ်တို့က ဖမ်းဆီးထားပါတယ်။
“ဓားပြတိုက်တာကတော့ နယ်မြေ ၅မှာဖြစ်တယ်။ ဓားပြတွေက ယူနီဖောင်းနဲ့တစ်ယောက်ပါတယ်။ သူတို့က တရုတ်စကားပြောတဲ့သူတွေဖြစ်တယ်” လို့ အမည်မဖော်လိုတဲ့ နောက်ထပ်သတင်းရင်းမြစ်ထံသိရပါတယ်။
၁၀၅ မိုင်ကို တအာင်းတပ်မတော်- TNLA ၊ ရက္ခိုင့်တပ်တော်- AA နှင့် ကိုးကန့်တပ်-MNDAAတို့ ပူးတွဲ ထိန်းချုပ်ထားတဲ့ ဒေသတစ်ခု ဖြစ်ပါတယ်။
