ပို့လဘား၊ ဧပြီ ၂၅ ရက်၊ လားရှိုး
ရှမ်းမြောက် လားရှိုးမြို့မှာ မင်္ဂလာဆောင်ဓာတ်ပုံ လာရိုက်သူ ဓားပြ တိုက်ခံခဲ့ရတယ်လို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
မနေ့ ဧပြီ ၂၄ ရက် ည ၆ နာရီကျော်မှာ လားရှိုးမြို့မှာရှိတဲ့ ဟွာလီ ဓာတ်ပုံဆိုင်တစ်ခုမှာ အမျိုးသားသုံးဦးက ပစ္စတို သေနတ် ကိုင်ဆောင်ပြီး မင်္ဂလာဆောင်မယ့် အမျိုးသမီးရဲ့ခေါင်းကို သေနတ်နဲ့ ထောက်ပြီးတော့ ဓားပြ တိုက်ခဲ့တယ်လို့ ပြောပါတယ်။
“သူတို့နှစ်ယောက် ဓာတ်ပုံ လာရိုက်တာပေါ့။ အဲဒီမိန်းကလေးက ဒီကိုပြန်လာတာ မကြာသေးဘူး။ သူတခြားမြို့မှာ အလုပ် လုပ်နေတာ။ ကြည့်ရတာ သိတဲ့သူကပဲ လာတိုက်တာထင်တယ်။ ကားရော ပါသွားတယ်။ ကားထဲမှာလည်း ပိုက်ဆံ သိန်း ၁၁၀ ပါတယ်။ သူတို့မျက်နှာလည်း သေချာမမြင်ရဘူး။ Maskနဲ့ အုပ်ထားတယ်။ ကြည့်ရတာ တရုတ်လူမျိုးထင်တယ်။ ဓားပြ လာတိုက်တဲ့လူတွေကို ကြည့်ရတာ အသက် ၂၅၊ ၃၀ ဝန်းကျင်လောက် ရှိမယ်ထင်တယ်”
ပြီးခဲ့တဲ့ ဧပြီ ၂၃ ရက်ကလည်း လားရှိုးမြို့ ပါရမီလမ်းသွယ် ထင်းရှူးမြိုင်သို့သွားတဲ့လမ်းမှာ အမျိုးသမီးငယ်တစ်ဦး စာသင်ပြီး အပြန်လမ်းမှာ ဓားပြ တိုက်ခံခဲ့ရပါတယ်။
လားရှိုးမြို့မှာ ဧပြီလအတွင်း ဓားပြတိုက်မှု လုယက်မှု ၄ ကြိမ် ဖြစ်ပွားခဲ့ပါတယ်။
