မိုင်းရူပ၊ ဧပြီ ၂၄ ရက်၊ လောက်ကိုင်
ကိုးကန့်တပ်မတော်- MNDAA ထိန်းချုပ်ထားတဲ့ လောက်ကိုင်၊ ချင်းရွှေဟော်နဲ့ ကွမ်းလုံမြို့နယ်မှာ နေထိုင်ကြသူတွေထဲက ဒေသခံမဟုတ်သူတွေ နေထိုင်ခွင့်ကဒ် ပြုလုပ်ရမယ်လို့ MNDAA က မနေ့ ဧပြီ ၂၃ ရက်မှာ ထုတ်ပြန်လာပါတယ်။
တခြားဒေသကနေ ကိုးကန့်ဒေသထဲ ရွှေ့ပြောင်းနေထိုင်လိုသူ၊ စီးပွားရေးသမားနဲ့ အခြေခံ အလုပ် လုပ်ကိုင်လိုသူအနေနဲ့ နေထိုင်ခွင့်ကဒ် ပြုလုပ်ရမယ်လို့ MNDAA က ဆိုပါတယ်။
“ဗမာလူမျိုးတွေကိုပဲ တင်းကြပ်တာ မဟုတ်ဘူးဗျ။ နေထိုင်ခွင့်ကဒ် မရှိရင် သက်ဆိုင်ရာဒေသကို ပြန်ပို့တာ။ ကဒ်လုပ်ခိုင်းတယ်။ ကဒ်မလုပ်ရင် ပြန်ပို့တာမျိုးရှိတယ်” လို့ MNDAA နဲ့ နီးစပ်သူတစ်ဦးက ရွှေဖီမြေကို ပြောပါတယ်။
ဒေသခံတွေကတော့ ကိုးကန့်ဒေထဲ ဝင်ရောက်လာသူတွေထဲမှာမှ ဗမာလူမျိုးကို ပိုတင်းကြပ်ပြီး ကိုးကန့်ဒေသအတွင်း ဝင်လာသူကို ကွမ်းလုံကြိုးတံတား၊ ဝဒေသနဲ့ ကိုးကန့်ဒေသနယ်စပ်ရှိ ဖောင်ဆိပ်တံတားမှာ ကိုးကန့်တပ်က စစ်ဆေးပြီး ဖမ်းဆီးတာ ရှိနေတယ်လို့ ရွှေဖီမြေကို ပြောပါတယ်။
“လားရိူးကနေလာရင် ကွမ်းလုံကြိုးတံတားမှာ စစ်တာ။ ဝဘက်ကနေလာရင် ဖောင်ဆိပ်တံတားမှာ စစ်တာ။ အလုပ်ရုံတွေမှာလည်း ဝင်စစ်ပါတယ်။ တခြားတိုင်းရင်းသားဖြစ်နေလဲ (ကွမ်းလုံ၊ ချင်းရွှေဟော်၊ လောက်ကိုင်)မှတ်ပုံတင် ဖြစ်နေမှ ဝင်လို့ရတာ” ဆိုပြီး လောက်ကိုင်ဒေသခံတစ်ဦးက ရွှေဖီမြေကို ပြောပါတယ်။
နေထိုင်ခွင့်ကဒ် ပြုလုပ်လိုသူတွေအနေနဲ့ မှတ်ပုံတင်၊ အိမ်ထောင်စုနဲ့ ထောက်ခံပေးမယ့်သူ လိုအပ်ပြီး လောက်ကိုင်မြို့ တုန်ချိန်ရဲစခန်းမှာ အသေးစိတ် စုံစမ်းနိုင်တယ်လို့ ကိုးကန့်တပ်က အသိပေးထားပါတယ်။
၁၀၂၇ စစ်ဆင်ရေး ပထမလှိုင်း ဖော်ဆောင်ပြီးနောက် MNDAA က ကိုးကန့်ဒေသထဲ ဗမာလူမျိုး ဝင်ရောက်ခွင့် တင်းကြပ်ခဲ့ဖူးပြီး ရှမ်းမြောက် လားရှိုးမြို့ကနေ ကိုးကန့်တပ် ဆုတ်ခွာသွားပြီးနောက်မှာလည်း ကိုးကန့်ဒေသထဲ ဝင်ရောက်ခွင့် ပြန်လည် တင်းကြပ်လာတာ ဖြစ်ပါတယ်။
