မိုင်းရူပ၊ ဧပြီ ၂၃ ရက်၊ ရပ်စောက်
ရှမ်းတောင် ရပ်စောက်မြို့နယ် ကျောက်ဂူဒေသမှာ ၁ လအတွင်း စစ်ကောင်စီတပ်နဲ့ ဓနုတပ်တော်- DPLA အကြား တိုက်ပွဲ ၂၀ ကြိမ်ထက်မနည်း ဖြစ်ပွားခဲ့ကာ စစ်ကောင်စီတပ်ဖွဲ့ဝင် ၃ ဦးကို အရှင်ဖမ်းဆီးရမိခဲ့ပါတယ်။
ပြီးခဲ့တဲ့ မတ်လ နောက်ဆုံးအပတ်ကနေ ဧပြီ တတိယပတ်အထိ ၁ လအတွင်း တိုက်ပွဲပေါင်း ၂၀ ကျော် ဖြစ်ပွားခဲ့ကာ အတင်းအဓမ္မ တပ်သားသစ် စုဆောင်းခံရတဲ့ စစ်ကောင်စီတပ်ဖွဲ့ဝင် ၃ ဦးဟာ DPLA ထံ အလင်းဝင်ခဲ့တယ်လို့ DPLA ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဧပြီ ၂၁ ရက်မှာလည်း ရှမ်းမြောက် နောင်ချိုမြို့နယ် တောင်းခမ်းရွာဘက် စစ်ကူလာတဲ့ စစ်ကောင်စီစစ်ကြောင်းကို ကျောက်ဂူဒေသမှာ DPLA က ကြားဖြတ်တိုက်ခိုက်ခဲ့ပြီး မနေ့ ဧပြီ ၂၂ ရက်အထိ တိုက်ပွဲ ဆက်ဖြစ်နေတယ်လို့ ဆိုပါတယ်။
“တစ်လအတွင်း ထိတွေ့တိုက်ပွဲပေါင်း ၂၀ ထက်မနည်း ရှိတယ်။ ဧပြီ ၂၁ ရက်မှာလည်း တောင်းခမ်းကိုလာတဲ့ ကားတန်းကို ဖြတ်တိုက်ရင်း တိုက်ပွဲ ဖြစ်နေတာ။ စစ်မှုထမ်းဥပဒေနဲ့ အခေါ်ခံရတဲ့ စစ်ကောင်စီတပ်တပ်ဖွဲ့ဝင် ၃ ဦး လက်နက် ထားခဲ့ပြီး ကျနော်တို့ဆီ အလင်းဝင်လာ တာ ရှိတယ်” လို့ DPLA ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
ရပ်စောက်-ကျောက်ဂူလမ်းဟာ တိုက်ပွဲ ပြင်းထန်နေတဲ့ တောင်းခမ်းရွာဘက် စစ်တပ်က စစ်အင်အား အဓိက ဖြည့်တင်းနေတဲ့လမ်းကြောင်း ဖြစ်တယ်လို့ စစ်ရေးအခြေအနေ သိရှိသူတွေက ပြောပါတယ်။
စစ်ကောင်စီရဲ့ အမြှောက်တပ် တည်ရှိရာ တောင်းခမ်းမှာ စစ်တပ်ဘက်က ထိုးစစ်ဆင် တိုက်ခိုက်နေတာကြောင့် စစ်ကောင်စီတပ်နဲ့ TNLA၊ DPLA ပူးပေါင်းတပ်တို့ တိုက်ပွဲ ဆက်လက် ပြင်းထန်နေပါတယ်။
