ယာရူစိင်၊ ဧပြီ ၂၃ ရက်၊ လားရှိုး
ရှမ်းမြောက် လားရှိုးမြို့ပေါ် စစ်ကောင်စီတပ် ဝင်ရောက်လာပြီးနောက် စာသင်ပြီး ပြန်လာတဲ့ အမျိုးသမီးတစ်ဦး ဓားပြတိုက် လုယက်ခံခဲ့ရပါတယ်။
ဒီနေ့ ဧပြီ ၂၃ ရက် မနက် ၈ နာရီမှာ ပါရမီလမ်းသွယ် ထင်းရှုးမြိုင်သို့သွားတဲ့ လမ်းခုလတ်တစ်နေရာမှာ အမျိုးသမီးငယ်တစ်ဦး စာသင်ပြီး အပြန်လမ်းမှာ အမျိုးသား ၂ ဦးက ဖုန်း လုခဲ့တယ်လို့ မျက်မြင်တွေ့ရှိသူတစ်ဦးက ရွှေဖီမြေကို ပြောပါတယ်။
“ကလေးမရဲ့ဖုန်းကို လုတာ ဘာမှတော့ မပါသွားဘူး။ ဖုန်းလုတဲ့အချိန်မှာ ကလေးမက ဖုန်းကို လမ်းဘေးတစ်နေရာမှာ ပစ်လိုက်တာပေါ့။ အဲဒါနဲ့ပဲ ဓားပြတွေက သူ့ကို ဓားနဲ့ခုတ်လိုက်တာ။ ကျနော်တို့ ကလေးမအနား ရောက်တဲ့အချိန်မှာ သွေးတွေပဲ”
အဲဒီအမျိုးသား ၂ ဦးဟာ ဖုန်းလုရင်း အမျိုးသမီးငယ်ရဲ့ လည်ပင်းကို ဓားနဲ့ခုတ်ဖို့ လုပ်နေချိန်မှာ အမျိုးသမီးငယ်ဟာ လက်နဲ့ ကာလိုက်တာကြောင့် လက်မှာ ဒဏ်ရာ ရရှိခဲ့တယ်လို့ ၎င်းက ဆက်ပြောပါတယ်။
“ကျနော်က မူဆယ်မြို့လိုဖြစ်မှာကြောက်တာ။ လူသတ်မှုဖြစ်လည်း အမှုမပေါ်မှာကို စိုးရိမ်ရတယ်။ လုံးခြုံရေးပိုင်းလည်း ဘယ်လိုလာမလဲတော့ မသိဘူး။ စစ်တပ်က ဝင်လာပြီးကတည်း မလုံခြုံတော့သလို ခံစားလာရတယ်။ လေကြောင်း တိုက်ခိုက်တာ မရှိတော့ပေမဲ့ လုံခြုံမှုအပိုင်းတော့ မသေချာဘူးပေါ့” လို့ လားရှိုးမြို့ ဒေသခံတစ်ဦးက ပြောပါတယ်။
လားရှိုးမြို့မှာ စစ်တပ်က ဝင်ရောက်လာပြီ ဖြစ်တာကြောင့် ခိုးမှု၊ လုယက်မှု၊ ဓားပြတိုက်မှုနဲ့ လူသတ်မှု ဖြစ်ပွားလာမှာ စိုးရိမ်နေရတယ်လို့ သူက ဆက်ပြောပါတယ်။
လားရှိုးမြို့ကို စစ်ကောင်စီထံ လွှဲပြောင်းပေးတာနဲ့ ပတ်သက်လို့ စစ်ကောင်စီရော ကိုးကန့်တပ်ကပါ တစ်စုံတစ်ရာ ထုတ်ပြန်ပြောဆိုတာ မရှိတာကြောင့် လူထုတွေကြား စိုးရိမ်မှု မြှင့်တက်နေပါတယ်။
လားရှိုးမြို့ကို စစ်တပ်က ပြန်မတိုက်ယူနိုင်ပေမဲ့ တရုတ်နိုင်ငံရဲ့ အကူအညီနဲ့ ပြန်လည် အုပ်ချုပ်ခွင့်ရတော့မှာ ဖြစ်ပါတယ်။
