အိုက်ပွီး၊ ဧပြီ ၂၁ ရက်၊ တွန်းဇံ
ချင်းလဲန်းကောင်စီ- CC ထိန်းချုပ်ထားတဲ့ ချင်းပြည်နယ် တွန်းဇံမြို့ကို ဇိုမီးတော်လှန်ရေးတပ်ဖွဲ့- ZRA က စစ်ကောင်စီထောက်ပံ့တဲ့ လက်နက်ခဲယမ်းနဲ့ ထိုးစစ်ဆင် တိုက်ခိုက်နေတယ်လို့ ချင်းအမျိုးသားတပ်မတော်- CNA က ပြောပါတယ်။
ဒီနေ့ ဧပြီ ၂၁ ရက် မနက်မှာ CNF/CNA၊ CDF-KKG တို့ ပြုလုပ်တဲ့ အွန်လိုင်း သတင်းစာ ရှင်းလင်းပွဲမှာ CNA ပြောခွင့်ရ ဆလိုင်း ထက်နီက ချင်းပြည်နယ် စစ်ရေးအခြေအနေနဲ့ ပတ်သက်ပြီး အခုလို ပြောကြားတာပဲ ဖြစ်ပါတယ်။
“မကြာသေးခင်ကဘဲ စစ်ကောင်စီရဲ့ ပံ့ပိုးမှုနဲ့ လက်နက်သော်လည်းကောင်း၊ ဒရုန်းနဲ့ သော်လည်းကောင်း၊ ကျည်ဆံသော်လည်းကောင်း အတွင်းသတင်း ရရှိထားတာ ရှိပါတယ်” လို့ CNA ပြောခွင့်ရ ဆလိုင်း ထက်နီက ပြောပါတယ်။
မနေ့ ဧပြီ ၂၀ ရက် မနက်ပိုင်းက ZRA တပ်ဖွဲ့ဝင် အင်အား ၃၀၀ ကျော်ဟာ တွန်းဇံမြို့ကို ထိုးစစ်ဆင် တိုက်ခိုက်လာတာကြောင့် နှစ်ဖက်အပြန်အလှန် တစ်ကျော့ပြန်တိုက်ပွဲ ဖြစ်ပွားခဲ့တယ်လို့ CNA ပြောခွင့်ရ ဆလိုင်း ထက်နီက ပြောပါတယ်။
“တွန်းဇံမြို့ပေါ်နဲ့ တွန်းဇံနယ်ထဲမှာ အခုတိုက်ပွဲက တစ်ကျော့ပြန် တိုက်ပွဲလို့ ပြောလို့ရပါတယ်။ မနေ့က ၂၀ ရက်နေ့ ZRA က အင်အား အလုံးအရင်းနဲ့ တွန်းဇံမြို့ထဲကို တက်လာတယ်။ အဲဒါကို ကျနော်တို့နေတဲ့ နေရာတွေကို သူတို့က ပစ်ခတ်မှု လုပ်တယ်။ ဒါပေမဲ့ ကျနော်တို့က တုန့်ပြန်တယ်။ မနေ့ကပဲ သူတို့အားလုံး တွန်းဇံမြို့ထဲကနေ ပြန်ဆုတ်ပါတယ်”
အဲဒီပစ်ခတ်မှုမှာ ZRA ဘက်က ၄ ဦး ကျဆုံးပြီး ၆ ဦး ဒဏ်ရာ ရရှိခဲ့တယ်လို့ ဆိုပါတယ်။
တွန်းဇံမြို့က ZRA တပ်ဖွဲ့ဟာ ကျီးခါးမြို့ဘက်ခြမ်းကို ပြန်လည် ဆုတ်ခွာသွားတာဖြစ်ပြီး အပြီးတိုင် ဆုတ်ခွာသွားခြင်း မဟုတ်တာကြောင့် အချိန်မရွေး တိုက်ပွဲဖြစ်လာနိုင်တယ်လို့ CNA ပြောခွင့်ရ ဆလိုင်း ထက်နီက ပြောပါတယ်။
ဒါ့အပြင် ZRA တပ်ဖွဲ့ဟာ တွန်းဇံမြို့ကို ထိုးစစ်ဆင်ဖို့ အိန္ဒိယနိုင်ငံ မဏိပူရ်ဘက်ခြမ်းက အင်အားအများစုနဲ့ ဝင်ရောက်လာတယ်လို့ ဆိုပါတယ်။
“သူတို့အနေအထားကို ကြည့်လိုက်ရင် မဏိပူရ်ကနေ တက်လာတာတွေ ရှိသလို အဲဒီဒေသဘက် နဂိုရှိပြီးသားတွေလည်း ရှိမှာပေါ့နော်” လို့ CNA ပြောခွင့်ရ ဆလိုင်း ထက်နီက ဆက်ပြောပါတယ်။
ပြီးခဲ့တဲ့ ဧပြီ ၃ ရက်ကလည်း ZRA တပ်ဖွဲ့ဟာ တွန်းဇံမြို့ကို ထိုးစစ်ဆင် တိုက်ခိုက်တာကြောင့် CC တပ်ဖွဲ့နဲ့ တိုက်ပွဲ အပြင်းအထန် ဖြစ်ပွားခဲ့ဖူးပါတယ်။
