အိုက်ပွီး၊ ဧပြီ ၁၆ ရက်၊ ကလေး
စစ်ကိုင်းတိုင်း ကလေးမြို့ တောင်ဖီလာရပ်ကွက်မှာ စစ်ကောင်စီတပ်ရဲ့ စစ်ကျန်ပစ္စည်း ပေါက်ကွဲလို့ အသက် ၅ နှစ်အောက် ညီအစ်ကို ကလေးနှစ်ဦး သေဆုံးခဲ့တယ်လို့ ဒေသခံတွေဆီက သိရပါတယ်။
ဒီနေ့ ဧပြီ ၁၆ ရက် မနက်ပိုင်းက တောင်ဖီလာရပ်ကွက်ထဲ စစ်ကောင်စီ တပ်စွဲထားတဲ့ နေပြည်တော်ဝန်ထမ်းအိမ်ရာအနီး ခြံထဲမှာ ညီအစ်ကိုနှစ်ဦး ဆော့ကစားနေစဉ် စစ်ကျန်ပစ္စည်း ပေါက်ကွဲမှုဖြစ်ပြီး သေဆုံးခဲ့တာပဲ ဖြစ်ပါတယ်။
“အာဏာသိမ်းပြီး နေပြည်တော်ဝန်ထမ်းအိမ်ရာမှာ စစ်ကောင်စီတပ်ဖွဲ့ဝင်တွေ တပ်စွဲထားတယ်။ ပြီးတော့ အနီးအနား ဘေးပတ်လည်မှာ မိုင်းတွေ ထောင်ထားတယ်။ ဒီနေ့ ပေါက်ကွဲတာလည်း သူတို့မိုင်းလည်း ဖြစ်နိုင်သလို ဒရုန်းဗုံးသီးလည်း ဖြစ်နိုင်တယ်။ ကလေးနှစ်ယောက်ကတော့ အဲနေရာမှာပဲ ပွဲချင်းပြီး ဆုံးသွားတယ်” လို့ ရပ်ကွက်နေ အမျိုးသားတစ်ဦးက ရွှေဖီမြေသို့ ပြောပါတယ်။
ပေါက်ကွဲမှု ဖြစ်ပွားတဲ့နေရာကို စစ်ကောင်စီတပ်ဖွဲ့ဝင် ချက်ချင်း ရောက်လာကာ ကလေးနှစ်ဦးရဲ့ အလောင်းကို စစ်ဆေးဖို့ ယူသွားသလို ကလေးဖခင်ကိုလည်း ခေါ်သွားပြီး နေ့လယ်မှာ ကလေးအလောင်းကို ပြန်ပေးခဲ့တယ်လို့ သိရပါတယ်။
“မနက်ပိုင်းတော့ အလောင်းကို စကစက စစ်ဆေးဖို့ ယူသွားပါတယ်။ ကလေးအဖေကိုလည်း ခေါ်သွားတယ်။ နေ့လယ်လောက်မှ ကလေးအလောင်းတွေ ပြန်ပေးတယ်။ သူ့အဖေလည်း ပြန်ရောက်ပါပြီ။ ကလေးအမေဆို စိတ်မကောင်းလို့ သတိတောင်လစ်တယ်။ အလောင်းကို မနက်ဖြန် သူတို့ရွာမှာ သဂြိုလ်မယ်ပြောတယ်” လို့ ရပ်ကွက်နေ အမျိုးသားတစ်ဦးက ရွှေဖီမြေသို့ ပြောပါတယ်။
သေဆုံးသူဟာ အသက် ၅ နှစ်အရွယ် Tg Gin Lam Sang နဲ့ ညီဖြစ်သူ ၃ နှစ်အရွယ် Tg Tuan Sian Hon ဖြစ်ပြီး ကလေးမြို့နယ် ပြည်တော်သာကျေးရွာကနေ မြို့ပေါ် စစ်ဘေးရှောင်လာကြတာပဲ ဖြစ်ပါတယ်။
