အိုက်ပွီး၊ ဧပြီ ၁၂ ရက်၊ ဒီပဲယင်း
စစ်ကိုင်းတိုင်း ဒီပဲယင်းမြို့နယ် ကျခတ်ကျေးရွာ ဘုန်းကြီးကျောင်းကို စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်ခဲ့လို့ ကိုရင် ၃ ပါးအပါအဝင် လူ ၆ ဦး သေဆုံးခဲ့တယ်လို့ ဒေသခံအမျိုးသားတစ်ဦးက ရွှေဖီမြေသို့ ပြောပါတယ်။
ဒီနေ့ ဧပြီ ၁၂ ရက် နေ့လယ် ၂ နာရီဝန်းကျင်မှာ ဒီပဲယင်းမြို့နယ် ကျခတ်ရွာ ဘုန်းကြီးကျောင်းကို မြေပြင်တိုက်ပွဲမရှိဘဲ ဂျက်ဖိုက်တာတစ်စီးနဲ့ ဗုံးကြဲတိုက်ခိုက်ခဲ့တာပဲ ဖြစ်ပါတယ်။
“ရွာဘုန်းကြီးကျောင်းမှာ တရားပွဲ ရှိတယ်။ ခါကြီးရက်ကြီး သင်္ကြန်ကာလအတွင်းဆိုတော့ တရားပွဲ လုပ်ကြတယ်။ တိုက်ပွဲ မရှိဘူး။ ကျန်တာ ဘာမှမရှိဘူး။ အဲတရားပွဲမှာ လေကြောင်း တိုက်ခိုက်သွားတာပါ။ တရားပွဲတောင် မချန်ပဲ တော်တော်ယုတ်မာတဲ့ စစ်တပ်ပဲ” လို့ ဒေသခံ အမျိုးသားတစ်ဦးက ရွှေဖီမြေသို့ ပြောပါတယ်။
လေကြောင်းနဲ့ တိုက်ခိုက်လို့ ကိုရင် ၃ ပါး၊ ဘုန်းကြီးကျောင်းသား ၁ ဦး၊ ကပ္ပိယ ၁ ဦးနဲ့ အမျိုးသမီး ၁ ဦး သေဆုံးခဲ့ပြီး အရပ်သား ၅ ဦးထက်မနည်း ဒဏ်ရာ ရရှိကာ အသက်အန္တရာယ် စိုးရိမ်ရသူနှစ်ဦးလည်း ရှိတယ်လို့ သိရပါတယ်။
စစ်တပ်ဟာ သင်္ကြန်ကာလအတွင်းမှာလည်း လေကြောင်း တိုက်ခိုက်မှု ဆက်တိုက် ပြုလုပ်လာနိုင်တာကြောင့် လူထုတွေအနေနဲ့ လူစုလူဝေး မပြုလုပ်ဖို့နဲ့ လေကြောင်းအန္တရာယ် ဂရုစိုက်ဖို့ တိုက်တွန်းထားပါတယ်။
“စစ်ကိုင်းတိုင်းမှာ လေကြောင်း တိုက်ခိုက်မှုတွေ ရှိနေသေးတယ်။ ဝန်းသို၊ ကောလင်းနယ်တွေမှာဆို နေ့တိုင်းလိုလို လေကြောင်း တိုက်ခိုက်တယ်။ အဲဒါကြောင့် သင်္ကြန်ကာလအတွင်းလည်း စစ်တပ်က လေကြောင်း တိုက်ခိုက်မှုတွေ ရပ်မှာမဟုတ်ဘူး။ လေကြောင်း တိုက်ခိုက်မှုတွေ ဆက်ရှိနေနိုင်သေးတယ်။ ပြည်သူတွေအနေနဲ့ လူစုလူဝေး၊ ပွဲလမ်းသဘင်တွေလုပ်တာ ဂရုစိုက်စေချင်တယ်” လို့ ပြည်သူ့ကာကွယ်ရေးတပ်(ဒီပဲယင်း)ရဲ့ တပ်ရင်းမှူးအဆင့်ရှိသူတစ်ဦးက ရွှေဖီမြေသို့ ပြောပါတယ်။
စစ်တပ်က ငလျင်အရေးပေါ် ကြေညာထားတဲ့ ကာလမှာလည်း စစ်ကိုင်းတိုင်းထဲက မြို့နယ်တချို့မှာ တိုက်ပွဲမရှိပေမဲ့ နေ့စဉ် လေကြောင်းကနေ ဗုံးကြဲတိုက်ခိုက်လို့ အရပ်သားတွေ ထိခိုက်သေဆုံးခဲ့ရပါတယ်။
