ရွှေဖီမြေ၊ ဧပြီ ၉ ရက်၊ နောင်ချို
ဒီနေ့ ဧပြီ ၉ ရက် နေ့လယ် ၁ နာရီခန့်မှာ စစ်ကောင်စီတပ်က နောင်ချိုမြို့နယ် နမ့်ဆောင်းဟူးရွာကို ဗုံး ထပ်ကြဲချခဲ့ပြီး အရပ်သား ၁ ဦး ထိခိုက်ဒဏ်ရာ ရခဲ့တယ်လို့ နောင်ချိုမြို့ရှိ ဒေသခံတစ်ဦးက ပြောဆိုပါတယ်။
“ကြဲတာက ၂ လုံး။ တစ်နေရာစီပေါ့။ တစ်လုံးက မကွဲဘူး။ ကွဲတဲ့အလုံးက အိမ်ထိခိုက်မှု ရှိတယ်။ အိမ်သားတစ်ယောက် ထိတယ်။ မစိုးရိမ်ရဘူး”
ပြီးခဲ့တဲ့ ဧပြီ ၅ ရက် ညပိုင်းကလည်း အဲဒီနမ့်ဆောင်းဟူးရွာထဲ ဗုံးကြဲချခဲ့လို့ နေအိမ် ၂ လုံး ထိခိုက်ပျက်စီးခဲ့ပါတယ်။
တောင်းခမ်းရွာမှာလည်း တိုက်ပွဲ ဆက်လက် ပြင်းထန်နေလို့ စစ်တပ်က လေကြောင်းကနေ အပြင်းအထန် ခုခံကာကွယ်နေတယ်လို့ ရှေ့တန်း စစ်မြေပြင်မှ သတင်းအရင်းအမြစ်က ရွှေဖီမြေကို ပြောပါတယ်။
စစ်တပ်နဲ့ တော်လှန်ရေးတပ်တို့ ငလျင်ဘေးကြောင့် အပစ်အခတ် ရပ်စဲထားကြောင်း ထုတ်ပြန်ထားကြပေမဲ့ အပစ်အခတ် ရပ်စဲတာကို ချိုးဖောက်နေကြောင်း နှစ်ဖက်စလုံးက အပြန်အလှန် စွပ်စွဲထားကြပါတယ်။
