ရွှေဖီမြေ၊ ဧပြီ ၉ ရက်
ကချင်တပ်မတော်- KIO/KIA နဲ့ တအာင်းတပ်မတော်- PSLF/TNLA တို့အကြား ဆွေးနွေးနိုင်ဖို့ ရှေ့ပြေး ညှိနှိုင်းမှုတွေ စတင်နေပြီလို့ KIO ရဲ့ ဒုဥက္ကဌ ဒုဗိုလ်ချုပ်ကြီး ဂွမ်မော်က ၎င်းရဲ့ လူမှုကွန်ရက်ပေါ်မှာ အသိပေးလာပါတယ်။
KIO နဲ့ PSLF နှစ်ဖွဲ့ ဆွေးနွေးပွဲအတွက် ညှိနှိုင်းမှု စတင်နေပြီး သက်ဆိုင်ရာ ဒေသတွင်းရှိ လူထုတွေ နားလည်ကူညီပေးဖို့၊ အွန်လိုင်း သုံးစွဲသူတွေ၊ မီဒီယာတွေ၊ အကြံပေး ထောက်ပြလိုသူတွေဆီကနေလည်း အပြုသဘောဆောင်တဲ့ ကူညီပံ့ပိုးမှု မျှော်လင့်တယ်လို့ ဒုဗိုလ်ချုပ်ကြီး ဂွမ်မော်က ပြောပါတယ်။
ဆွေးနွေးပွဲအတွက် ညှိနှိုင်းမှု စတင်နေပြီလို့သာ ဒုဗိုလ်ချုပ်ကြီး ဂွမ်မော်က ဖော်ပြထားပြီး ဘယ်အချိန်မှာ စတင်ဆွေးနွေးမယ်ဆိုတာကိုတော့ တိတိကျကျ ဖော်ပြထားတာ မရှိပါဘူး။
KIA နဲ့ TNLA အကြား ဆွေးနွေးမယ့်အခြေအနေနဲ့ ပတ်သက်ပြီး တအာင်းတပ်ရဲ့ သဘောထားကို သိနိုင်ဖို့ PSLF/TNLA ရဲ့ ပြောခွင့်ရသူ လွေးယေဦးကို ရွှေဖီမြေက ဆက်သွယ်မေးမြန်းနေဆဲ ဖြစ်ပါတယ်။
ပြီးခဲ့တဲ့ ဇန်နဝါရီလကစပြီး ရှမ်းမြောက် နမ့်ခမ်းမြို့နယ် မိုင်းဝီးရွာ၊ မန်တုံနဲ့ ကွတ်ခိုင်မြို့နယ်မှာ KIA နဲ့ TNLA အောက်ခြေတပ်သားအချင်းချင်း ပွတ်တိုက်မှုတွေ မကြာခဏ ဖြစ်ပွားခဲ့တာပါ။
ပြီးခဲ့တဲ့ မတ်လ ၇ ရက်မှာလည်း ကွတ်ခိုင်မြို့ထဲ KIA ဘက်က ဝင်ရောက်ရာကနေ နှစ်ဖက်တပ် အငြင်းပွားမှု ဖြစ်ပွားခဲ့ပြီး ကွတ်ခိုင်မြို့ရှိ KIA ရဲ့ ဆက်ဆံရေးရုံးကို TNLA က ဝင်ရောက် စီးနင်းခဲ့ရာ နှစ်ဖက်တပ်အကြား ထိုးကြိတ်မှု ဖြစ်ပွားခဲ့ပါတယ်။
ရှမ်းမြောက်ရဲ့ နယ်မြေ အငြင်းပွားမှုတွေကို ဖြေရှင်းရာမှာ ငြိမ်းချမ်းစွာ အတူတကွ ယှဥ်တွဲနေထိုင်ရေးလမ်းစဥ်ကို ကျင့်သုံးသင့်ကြောင်း KIA နဲ့ TNLA အကြား အငြင်းပွားမှုတွေကို ဖြေရှင်းရာမှာ ဥပဒေအထောက်အကူပြုကွန်ယက်က ဒီနေ့မှာ ထုတ်ပြန်တဲ့ အကြုံပြုတိုက်တွန်းချက်မှာ ဖော်ပြထားပါတယ်။
TNLA နဲ့ KIA ဟာ မြောက်ပိုင်းမဟာမိတ်ဖြစ်တဲ့အပြင် “ဝ”တပ်- UWSA ဦးဆောင်တဲ့ ပြည်ထောင်စုနိုင်ငံရေး ဆွေးနွေးညှိနှိုင်းမှုကော်မတီ- FPNCC ရဲ့ အဖွဲ့ဝင်လည်း ဖြစ်ပါတယ်။
