အိုက်ပွီး၊ ဧပြီလ ၈ ရက်၊ ကလေး
စစ်ကိုင်းတိုင်း၊ ကလေးမြို့နယ်၊ နှောင်ပင်ကျေးရွာမှာ ပစ်ခတ်မှုဖြစ်ပွားပြီး ပျူစောထီးအပါအဝင် အရပ်သား ၄ ဦးသေဆုံးခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။
နှောင်ပင်ရွာမှာ တပ်စွဲထားတဲ့ စစ်ကောင်စီစခန်းကို ဒီနေ့ ဧပြီလ ၈ ရက် မနက် ၁ နာရီဝန်းကျင်မှာ ပြည်သူ့ကာကွယ်ရေးတပ်ဖွဲ့တွေက ဝင်ရောက်ပစ်ခတ်တိုက်ခိုက်ခဲ့တာဖြစ်ပါတယ်။
“နှစ်ဖက်အပြန်အလှန် ပစ်ခတ်မှုတွင်းမှာ စစ်ကောင်စီက လက်နက်ကြီးကျည် ရမ်းသမ်းပစ်ခတ်လို့ လူထိခိုက်သေဆုံးမှုဖြစ်ခဲ့တာပါ။ သေဆုံးသူတွေက ပျူစောထီးတွေနဲ့ အရပ်သားတွေလို့ သိရပါတယ်။ ပစ်ခတ်မှုက တစ်နာရီခန့်ကြာတယ်။”လို့ ကလေးမြို့နယ်မှ ဒေသခံတစ်ဦးက ရွှေဖီမြေသို့ ပြောပါတယ်။
အဲဒီအပြန်အလှန်ပစ်ခတ်မှုမှာ နှောင်ပင်ကျေးရွာက ကိုဖိုးလုံး၊ ကိုမင်းမင်းဦး၊ ကိုကျော်မင်းဇင်နဲ့ ကိုဆန်းလွင်တို့ သေဆုံးခဲ့ရပြီး နောက်ထပ်တစ်ဦးကလည်း ဒဏ်ရာရရှိခဲ့ပါတယ်။
ဒီနေ့မနက်မှာ အခင်းဖြစ်ပွားတဲ့ အဲဒီနှောင်ပင်ကျေးရွာမှာ မနက် ၇ နာရီတုန်းက ကလေးမြို့ကနေ စစ်ကောင်စီတပ်ဖွဲ့ဝင် အင်အားအများပြားနဲ့ လာရောက်ခဲ့ပြီး တပ်အင်အားဖြည့်တင်းထားတယ်လို့ သိရပါတယ်။
လတ်တလောမှာ စစ်ကောင်စီဦးဆောင်တဲ့ ပျူစောထီးတွေနဲ့ ဒေသခံတော်လှန်ရေးတပ်ဖွဲ့တို့ ကလေးမြို့နယ်မှာ စစ်ရေးတင်းမာနေတယ်လို့ သိရပါတယ်။
စစ်ကောင်စီတပ်ကလည်း ကလေးမြို့ပေါ်မှာ စစ်မှုထမ်းဥပဒေအကြောင်းပြပြီး လူငယ်တွေကို ဆက်တိုက်ဖမ်းဆီးမှုတွေပြုလုပ်ကာ စစ်သင်တန်းထဲ ပို့ဆောင်နေတယ်လို့ သိရပါတယ်။
ငလျင်အရေးပေါ်ကာလတွင်း စစ်ကောင်စီတပ်နဲ့ အမျိုးသားညီညွတ်ရေးအစိုးရ NUG တို့ဟာ ယာယီအပစ်ရပ်စဲပေမဲ့ ကလေးမြို့နယ်မှာ တိုက်ပွဲတွေဖြစ်ပွားနေပါတယ်။
