ယာရူစိင်၊ ဧပြီ ၇ ရက်၊ လားရှိုး
ကိုးကန့်တပ်-MNDAA ထိန်းချုပ်ထားတဲ့ လားရှိုးမြို့မှာ မြို့သိမ်းတိုက်ပွဲအတွင်း လက်နက်ကြီးကြောင့် ထိခိုက်ပျက်စီးသွားတဲ့ နေအိမ်တွေကို ကိုးကန့်တပ် တစ်အိမ်ကို ကျပ်သိန်း ၅၀ လျှော်ကြေးပေးသွားခဲ့တယ်လို့ ဒေသခံတွေက ရွှေဖီမြေကို ပြောပါတယ်။
၁၀၂၇ စစ်ဆင်ရေး ဒုတိယလှိုင်းအတွင်း လက်နက်ကြီးပေါက်ကွဲလို့ ပျက်စီးတဲ့ မြို့ထဲ နေအိမ်ပိုင်ရှင်တွေကို မနေ့ ဧပြီ ၆ ရက်မှာ ဆင့်ခေါ်ပြီး လားရှိုးမြို့ရှိ ယူနန်းခမ်းမမှာ ဒီနေ့ ဧပြီ ၇ ရက် မနက် ၁၀ နာရီအချိန်မှာ လျော်ကြေးငွေ ပေးသွားတာ ဖြစ်တယ်လို့ ဆိုပါတယ်။
“ပျက်စီးတဲ့အိမ်တွေပဲပေးမယ်တဲ့။ နည်းနည်းပဲပျက်စီးတဲ့အိမ်နဲ့ ပြိုကျတာမဟုတ်တဲ့ အိမ်တွေတော့ ပိုက်ဆံပေးမဲ့ထဲမှာ ပါချင်မှပါမှာပေါ့။ သိရသလောက်က တကယ်ပဲ လုံးဝပျက်စီးသွားတဲ့အိမ်တွေတော့ လျှော်ကြေးပေးတာပေါ့။ စာရင်း စကောက်တယ်ဆိုကတည်း လုံးဝနေလို့မရတော့တဲ့ အိမ်တွေကို ဦးစားပေး စာရင်းထဲကို ထားပြီးတော့မှ ကောက်တာပေါ့”လို့ လားရှိုးမြို့ဒေသခံ တစ်ဦးက ပြောပါတယ်။
လားရှိုးမြို့မှာ လျှော်ကြေးငွေ ပေးနေတာနဲ့ ပတ်သက်ပြီး ရွှေဖီမြေက လားရှ်ိုးမြို့ပြန်လည်ထူထောင်ရေးအဖွဲ့ထံ ဆက်သွယ်မေးမြန်းထားဆဲ ဖြစ်ပါတယ်။
ဒါကြောင့် လျှော်ကြေးငွေ ပေးသွားတဲ့ အိမ်အရေအတွက်နဲ့ ကျန်ရှိနေသေးတဲ့ အိမ်အရေအတွက် စာရင်းကိုတော့ ရွှေဖီမြေက မရရှိသေးပါဘူး။
လာမယ့် ဧပြီ ၂၁ ရက်မှာ MNDAA က လားရှိုးမြို့ကို စစ်ကောင်စီထံ လွှဲပြောင်းပေးသွားမယ်လို့ သတင်း ထွက်ပေါ်နေပေမယ့် မြို့အုပ်ချုပ်ရေးပိုင်းကို ဘယ်လို လုပ်ဆောင်သွားမယ်ဆိုတာတော့ ဘယ်ဘက်ကမှ တရားဝင် ထုတ်ပြန်တာ မရှိပါဘူး။
