မိုင်းရူပ၊ ဧပြီ ၆ ရက်၊ နောင်ချို
ရှမ်းမြောက် နောင်ချိုမြို့နယ် တောင်းခမ်းကျေးရွာ တိုက်ပွဲမှာ စစ်ကောင်စီတပ်က အဆိပ်ငွေ့ဗုံး အသုံးပြုတိုက်ခိုက်ခဲ့ကြောင်း တအာင်းတပ်မတော်- TNLA က ထုတ်ပြန်ပါတယ်။
မနေ့ ဧပြီ ၅ ရက် နေ့လယ် ၂ နာရီမှာ တောင်းခမ်းရှိ စစ်ကောင်စီရဲ့ အမြှောက်တပ်စခန်းကွပ်ကဲမှုဌာနချုပ် ၉၀၂ တပ်မှာ တိုက်ပွဲဖြစ်ပွားနေချိန် စစ်တပ်ဘက်က အဆိပ်ငွေ့ဗုံး ၃ လုံး ကြဲချတိုက်ခိုက်ခဲ့တယ်လို့ ဆိုပါတယ်။
ဒီနေ့ ဧပြီ ၆ ရက်အထိ ၉၀၂ တပ်စခန်းမှာ စစ်တပ်နဲ့ TNLA တို့အကြား တိုက်ပွဲ ဆက်လက် ပြင်းထန်နေတယ်လို့ ရှေ့တန်းသတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“မနေ့ အဆိပ်ဗုံးနဲ့ လာကြဲတာ ဟုတ်တယ်။ ဒီနေ့လည်း တိုက်ပွဲ ပြင်းထန်နေတယ်။ လက်နက်ကြီးနဲ့လည်း ဆက်တိုက် ပစ်နေတယ်”
စစ်တပ်ဟာ အပစ်ရပ်ထားပေမဲ့ TNLA ထိန်းချုပ်ဒေသတွေကို လေယာဥ်နဲ့ ဗုံးကြဲတာ၊ ထိုးစစ်ဆင်တာတွေ ပြုလုပ်နေတယ်လို့ TNLA က ဆိုပါတယ်။
မနေ့ ဧပြီ ၅ ရက်မှာလည်း TNLA ထိန်းချုပ်ထားတဲ့ နောင်ချိုမြို့နယ် နောင်လင်နဲ့ နမ့်ဆောင်ဟူးရွာထဲ ဂျက်လေယာဥ်နဲ့ ပေါင် ၂၅၀ ဗုံး ကြဲချတိုက်ခိုက်ခဲ့ပြီး နေအိမ် ၄ လုံး ပျက်စီးခဲ့ပါတယ်။
စစ်တပ်ဘက်ကတော့ တောင်းခမ်း တိုက်ပွဲမှာ အဆိပ်ငွေ့ဗုံး အသုံးပြုတိုက်ခိုက်ခဲ့တယ်ဆိုတဲ့ TNLA ရဲ့ ပြောကြားချက်နဲ့ ပတ်သက်ပြီး တစ်စုံတစ်ရာ တုန့်ပြန်ထားတာ မရှိသေးပါဘူး။
ငလျင် လှုပ်ခတ်မှု ဖြစ်ပွားပြီးနောက် စစ်ကောင်စီအပါအဝင် တိုင်းရင်းသာ လက်နက်ကိုင်အဖွဲ့နဲ့ အမျိုးသားညီညွတ်ရေးအစိုးရ- NUG က ယာယီ အပစ်ရပ်ကြောင်း ထုတ်ပြောကြပေမဲ့ အပြန်အလှန် တိုက်ခိုက်မှု ဆက်ရှိနေပြီး အပြန်အလှန် စွပ်စွဲနေကြပါတယ်။
