ရွှေဖီမြေ၊ ဧပြီ ၆ ရက်
ရခိုင်ပြည်နယ်နဲ့ ပဲခိုင်းတိုင်းအစပ် ပန်းတောင်းမြို့နယ်ရှိ စစ်ကောင်စီရဲ့ ညောင်ကျိုး တပ်စခန်းကို တိုက်ခိုက်သိမ်းပိုက်နိုင်ခဲ့တယ်လို့ အာရက္ခတပ်တော်- AA က မနေ့ ဧပြီ ၅ ရက်မှာ ထုတ်ပြန်ပါတယ်။
ညောင်ကျိုး တပ်စခန်းကို ပြီးခဲ့တဲ့ မတ်လ ၁၇ ရက်မှာ AA က စတင်တိုက်ခိုက်ခဲ့ရာ ဧပြီ ၂ ရက်မှာ အပြီးသတ် တိုက်ခိုက်သိမ်းပိုက်နိုင်ခဲ့ပြီး တပ်စခန်း သိမ်းပိုက်မှု အခြေအနေ အသေးစိတ်ကိုတော့ ဖော်ပြမထားပါဘူး။
AA ပါဝင်တဲ့ ညီနောင်မဟာမိတ် ၃ ဖွဲ့ဘက်က အပစ်ရပ်ပြီးနောက်မှာတော့ စစ်ကောင်စီရဲ့ တပ်စခန်းတွေကို ထိုးစစ်ဆင်မှု မလုပ်တော့ပေမဲ့ AA ထိန်းချုပ်ဒေသကို စစ်တပ်ဘက်က လက်နက်ကြီး၊ ဒရုန်းနဲ့ လေကြောင်း တိုက်ခိုက်မှု ဆက်လုပ်နေတယ်လို့ AA က ပြောဆိုပါတယ်။
စစ်တပ်ဟာ ရခိုင်ပြည်နယ် ကျောက်ဖြူမြို့နယ် သပြုတောင်၊ ပြားတဲနဲ့ ပြင်ရှည်ရွာတွေမှာ လက်နက်ကြီးနဲ့ဒရုန်း အသုံးပြု ပစ်ခတ်တိုက်နေပြီး ပြီးခဲ့တဲ့ ဧပြီ ၂ ရက် တစ်ရက်တည်းမှာတင် ဒရုန်းနဲ့ အကြိမ် ၉၀ ဝန်းကျင်၊ လက်နက်ကြီးနဲ့ ၆၀ ကြိမ်ထက်မနည်း ပစ်ခတ်တိုက်ခိုက်ခဲ့ပါတယ်။
ဒါ့အပြင် ဒီရက်ပိုင်းမှာလည်း စစ်တပ်ဟာ ကျောက်ဖြူနဲ့ စစ်တွေမြို့နယ်ထဲ လက်နက်ကြီးနဲ့ ပစ်ခတ်တာ၊ ဒရုန်းနဲ့လေယာဥ် အသုံးပြုပြီး ဗုံးကြဲတိုက်ခိုက်တာတွေ ဆက်လုပ်နေတယ်လို့ ဆိုပါတယ်။
ငလျင်သင့်တဲ့ လူထုတွေကို စာနာတဲ့အနေနဲ့ ပြန်လည်ထူထောင်ရေး ပြုလုပ်နိုင်ဖို့ အာရက္ခတပ်တော် ပါဝင်တဲ့ ညီနောင်မဟာမိတ် ၃ ဖွဲ့က ဧပြီလ တစ်လလုံး အပစ်ရပ်ကြောင်း ထုတ်ပြန်ထားပါတယ်။
မြန်မာနိုင်ငံမှာ ငလျင်လှုပ်ခတ်မှု ဖြစ်ပွားပြီးနောက် စစ်ကောင်စီအပါအဝင် တိုင်းရင်းသား လက်နက်ကိုင်အဖွဲ့နဲ့ အမျိုးသား ညီညွတ်ရေးအစိုးရ- NUG က ယာယီ အပစ်ရပ်ကြောင်း ထုတ်ပြောကြပေမဲ့ အပြန်အလှန် တိုက်ခိုက်မှု ဆက်ရှိနေပြီး အပြန်အလှန် စွပ်စွဲနေကြပါတယ်။
စစ်ကောင်စီရဲ့ ပြောခွင့်ရသူ ဗိုလ်ချုပ် ဇော်မင်းထွန်းကတော့ အပစ်ရပ်ပြီးနောက် တိုင်းရင်းသား လက်နက်ကိုင်တွေအပါဝင် ပြည်သူ့ကာကွယ်ရေးတပ်- PDF တွေဟာ စစ်တပ်စခန်းတွေကို တိုက်ခိုက်နေတယ်လို့ စွပ်စွဲပြောဆိုထားပါတယ်။
