ရွှေဖီမြေ၊ ဧပြီ ၅ ရက်၊ နောင်ချို
ပြီးခဲ့တဲ့ မတ်လ ၂၈ ရက် နေ့လယ်က ငလျင် လှုပ်ခတ်ပြီးချိန် ဂျက်ဖိုက်တာ ၃ စီးနဲ့ ဗုံးကြဲတိုက်ခိုက်ခံရပြီး ကျဆုံးသွားခဲ့တဲ့ ဓနုတပ်- DPLF/DPLA ရဲ့ စစ်မေ ၆ ယောက်နဲ့ တပ်သား ၁ ယောက်ရဲ့ ရက်လည်ကို မနေ့ ဧပြီ ၄ ရက်က ပြုလုပ်ခဲ့တယ်လို့ ဓနုတပ်တာဝန်ရှိသူတစ်ဦးက ရွှေဖီမြေကို ပြောပါတယ်။
ကျဆုံးသွားသူအားလုံးဟာ လူငယ်ပိုင်းတွေဖြစ်ပြီး အားလုံးက တော်လှန်ရေးမှာ တက်ကြွစွာ ပါဝင်နေကြသူတွေ ဖြစ်တယ်လို့ ဓနုတပ်ရဲ့ ခေါင်းဆောင်ဖြစ်သူ ဦးထွန်းထွန်းနိုင်က ပြောပါတယ်။
“အားလုံးက သူ့သဘောနဲ့သူ လာပြီး တာဝန်ထမ်းဆောင်တဲ့လူတွေပဲ။ အဲကျသွားတဲ့ Join ဆိုတဲ့ကလေးဆို ရှေ့တန်း ထွက်ချင်လွန်းလို့ အသက်ကို လိမ်ထားတာ။ တစ်ကယ်တမ်း သူ့အသက်က ၁၅ နှစ်ပဲ ရှိသေးတော့ ပြန်ခေါ်ထားလိုက်တာ”
ကျဆုံးသွားသူတွေဟာ နန္ဒာ (၁၉ နှစ်)၊ ထွေးထွေး (၁၇ နှစ်)၊ ရတီ (၁၉ နှစ်)၊ ထက်ထက် (၁၆ နှစ်)၊ နာဇီ (၂၂ နှစ်)၊ ပန်းအိ (၁၇ နှစ်)နဲ့ Join (၁၅ နှစ်)တို့ပဲ ဖြစ်ပါတယ်။
သူတို့အားလုံးဟာ ဂျက်ဖိုက်တာနဲ့ ဗုံး လာကြဲချိန် ကတုတ်ကျင်းထဲ ဝင်ရောက် ပုန်းခိုခဲ့ပေမဲ့ ဗုံးသီးဟာ ကတုတ်ကျင်းထဲ ကျရောက်ခဲ့တာကြောင့် ကျဆုံးခဲ့တာပဲ ဖြစ်ပါတယ်။
