မိုင်းရူပ၊ ဧပြီ ၄ ရက်၊ နောင်ချို
တအာင်းတပ်မတော်- TNLA ပါဝင်တဲ့ ညီနောင်မဟာမိတ် ၃ ဖွဲ့က အပစ်ရပ်ထားချိန် စစ်ကောင်စီတပ်ဟာ ရှမ်းမြောက် နောင်ချိုမြို့နယ် တောင်းခမ်းရွာရှိ စစ်တပ်စခန်းတွေမှာ စစ်အင်အား ဖြည့်တင်းနေတယ်လို့ တအာင်းတပ်ဘက်က ထုတ်ပြန်လာပါတယ်။
စစ်တပ်ဟာ မနေ့ ဧပြီ ၃ ရက် နေ့လယ် ၁၂ ဝန်းကျင်မှာ ရှမ်းတောင် ရပ်စောက်မြို့နယ် အင်းတော-ကျောက်ဂူ-တောင်ခြေကနေတဆင့် တောင်းခမ်းရှိ စစ်ကောင်စီရဲ့ အမြှောက်တပ်စခန်း ကွပ်ကဲမှုဌာနချုပ် ၉၀၂ ထဲ စစ်ကား ၇ စီးနဲ့ လူအင်အား ဖြည့်တင်းနေတယ်လို့ ဆိုပါတယ်။
ငလျင် လှုပ်ခတ်မှု ဖြစ်ပွားပြီးနောက် စစ်ရေးတွေ ငြိမ်သက်နေပေမဲ့ တောင်းခမ်းမှာ စစ်အင်အား ဖြည့်တင်းပြီး ဒီနေ့ ဧပြီ ၄ ရက်မှာ တိုက်ပွဲ ပြင်းထန်နေတယ်လို့ စစ်ရေး သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“စစ်ကောင်စီက အပစ်ရပ်တယ်လို့လည်း ပြောတယ်။ မနေ့က စစ်အင်အား ဖြည့်တယ်။ ဒီနေ့ သူတို့ ထိုးစစ် ပြန်လုပ်တာ။ ၉၀၂ မှာ တိုက်ပွဲ ပြင်းထန်နေတယ်”
ဧပြီ ၁ ရက်မှာလည်း ငလျင်ဒဏ်သင့်တဲလူထုတွေအတွက် ဝမ်းနည်းခြင်းအထိမ်းအမှတ်အဖြစ် သတ်မှတ်ထားတဲ့ စစ်တပ်ဟာ နောင်ချိုမြို့နယ် လွယ်ခွင်ရွာကို လေယာဥ်နဲ့ ဗုံးကြဲတိုက်ခိုက်ခဲ့ရာ ၅ ဦးဒဏ်ရာ ရခဲ့ပါတယ်။
ညီနောင်မဟာမိတ် ၃ ဖွဲ့က ငလျင်သင့်တဲ့လူထုတွေကို စာနာတဲ့အနေနဲ့ ပြန်လည် ထူထောင်ရေး ပြုလုပ်နိုင်ဖို့ ဧပြီ တစ်လလုံး အပစ်ရပ်ကြောင်း ထုတ်ပြန်ထားတာ ဖြစ်ပါတယ်။
စစ်တပ်ကလည်း ဧပြီ ၂ ရက်ကနေ ဧပြီ ၂၂ ရက်အထိ ၃ ပတ်ကြာ အပစ်ရပ်မယ်လို့ ကြေညာထားပေမဲ့ တော်လှန်ရေး အင်အားစုတွေ ထိန်းချုပ်ဒေသတွေကို လေကြောင်းနဲ့တိုက်ခိုက်တာ ထိုးစစ်ဆင်တာတွေ ပြုလုပ်နေပါတယ်။
အပစ်ရပ်ထားချိန် စစ်တပ်ဟာ စစ်ကိုင်း၊ မန္တလေး၊ ကရင်နီနဲ့ ရှမ်းမြောက်ရှိ တော်လှန်ရေး အင်အားစုတွေ ထိန်းချုပ်ထားတဲ့ ဒေသတွေမှာ လေကြောင်းတိုက်ခိုက်မှု ဆက်လက် လုပ်ဆောင်နေပါတယ်။
