ပို့လဘား၊ ဧပြီ ၂ ရက်၊ နောင်ချို
ငလျင်ဒဏ်သင့်တဲ့ လူထုတွေအတွက် ဝမ်းနည်းခြင်း အထိမ်းအမှတ်အဖြစ် သတ်မှတ်ထားတဲ့ စစ်ကောင်စီတပ်ဟာ ရှမ်းမြောက် နောင်ချိုမြို့နယ်ထဲ ဗုံး ဆက်ကြဲကာ တိုက်ခိုက်ခဲ့တယ်လို့ ဒေသခံတွေက ရွှေဖီမြေကို ပြောပါတယ်။
မနေ့ ဧပြီ ၁ ရက် ညနေ ၄ နာရီမှာ နောင်ချိုမြို့နယ် သဲခေါ်ရွာကနေ ဆမ္မဆယ်ရွာထဲ ဒရုန်းနဲ့ ဗုံးကြဲတိုက်ခိုက်လို့ တစ်ဦး သေဆုံးခဲ့တယ်လို့ ဆိုပါတယ်။
နောင်ချိုဒေသခံတစ်ဦးက “ညနေ ၄ နာရီပတ်ချာလည်မှာ ဒရုန်းနဲ့ လာချတယ်။ လူလည်း ထိတယ်။ ဆုံးသွားတယ် ပြောတာပဲ။ အိမ်တစ်လုံး ပျက်စီးတယ်လို့လည်း ကြားတယ်” လို့ ပြောပါတယ်။
ဗုံးကြဲလို့ တစ်ဦး သေဆုံးသွားတာနဲ့ ပတ်သက်ပြီး တအာင်းတပ်- TNLA ကလည်း ဒီနေ့ညနေမှာ သတင်းထုတ်ပြန်ထားပါတယ်။
အလားတူ နောင်ချိုမြို့နယ် လွယ်ခွင်ရွာကိုလည်း ဂျက်လေယာဉ်နဲ့ ဗုံး ၂ ကြိမ် ကြဲချတိုက်ခိုက်တာကြောင့် လွယ်ခွင်ရွာရှိ မြေဩဇာစက်ရုံအပါအဝင် နေအိမ်တချို့ ပျက်စီးပြီး ၅ ဦးထက်မနည်း ဒဏ်ရာ ရခဲ့ပါတယ်။
ငလျင် လှုပ်ခတ်ပြီးနောက် မတ်လ ၃၁ ရက်ကနေ ဧပြီ ၆ ရက်အထိ နိုင်ငံတော်အဆင့် ဝမ်းနည်းခြင်း အထိမ်းအမှတ်အဖြစ် စစ်ကောင်စီက သတ်မှတ်ကြေညာထားပေမဲ့ အရပ်သားတွေကို ရည်ရွယ်ချက်ရှိရှိ ဦးတည်ဗုံးကြဲတိုက်ခိုက်နေတယ်လို့ TNLA က ထုတ်ပြန်ထားပါတယ်။
ပြီးခဲ့တဲ့ မတ်လ ၃၁ ရက်မှာလည်း စစ်တပ်ဟာ TNLA ထိန်းချုပ်ထားတဲ့ နောင်ချိုမြို့နယ် ကျောက်ကြမ်းရွာကိုလည်း ဒရုန်း အသုံးပြုပြီး ၁၂၀ မမဗုံးနဲ့ တိုက်ခိုက်ခဲ့ပါတယ်။
