ရွှေဖီမြေ၊ ဧပြီ ၁ ရက်
ငလျင်နောက်ဆက်တွဲ ကယ်ဆယ်ရေးလုပ်ငန်း ထိရောက်စွာ ဆောင်ရွက်နိုင်ဖို့ တိုက်ပွဲ ဖြစ်ပွားတဲ့ နေရာတွေမှာ ထိုးစစ်ဆင်မှာမဟုတ်ဘဲ တစ်လကြာ တစ်ဖက်သတ် အပစ်ရပ်ကြောင်း ညီနောင်မဟာမိတ် ၃ ဖွဲ့က ထုတ်ပြန်လာပါတယ်။
ဧပြီ ၁ ရက်ကနေ ၃ဝ ရက်အထိ အပစ်ရပ်မှာဖြစ်ပြီး မိမိကိုယ်ကို ခုခံကာကွယ်တဲ့ တုန့်ပြန်မှုကလွှဲပြီး ထိုးစစ်ဆင်မှာ မဟုတ်ကြောင်း ညီနောင်မဟာမိတ် ၃ ဖွဲ့ဖြစ်တဲ့ တအာင်း TNLA၊ ကိုးကန့် MNDAA၊ ရခိုင် AA တို့က ထုတ်ပြန်လာတာပါ။
TNLA နဲ့ MNDAA ဟာ ၎င်းတို့ ထိန်းချုပ်ရာ မြို့နယ်မှာ သင်္ကြန်ပွဲတော် ကျင်းပဖို့ စီစဉ်ထားပေမဲ့ ငလျင်ဒဏ်သင့်သူတွေကို လူသားချင်းစာနာတဲ့အနေနဲ့ သင်္ကြန်ပွဲတော် ကျင်းပမှုကို ဖျက်သိမ်းလိုက်ကြောင်း ပြောဆိုထားပါတယ်။
မတ်လ ၂၈ ရက်က ဖြစ်ပွားခဲ့တဲ့ ငလျင် လှုပ်ခတ်မှုကြောင့် မန္တလေးနဲ့ စစ်ကိုင်းတိုင်းမှာ ထိခိုက်ပျက်စီးမှုအပြင် လူထောင်ချီ သေဆုံးခဲ့ပြီး ပျောက်ဆုံးနေသူတွေကို ကယ်ဆယ်ရေးအဖွဲ့က ရှာဖွေနေဆဲ ဖြစ်ပါတယ်။
