လွေးလာဝ်ဇာရ်၊ မတ်လ ၃၀ ရက်၊ လားရှိုး
ကိုးကန့်တပ်- MNDAA ထိန်းချုပ်ထားတဲ့ ရှမ်းမြောက် လားရှိုးမြို့အနီးရှိ ခေးနင်းကျေးရွာမှာ အသက် ၁၀ နှစ်အရွယ် ကလေးငယ်တစ်ဦးနဲ့ ဖခင်ဖြစ်သူ သတ်ခံခဲ့ရတယ်လို့ မိသားစုဝင်က ရွှေဖီမြေကို ပြောပါတယ်။
ဖြစ်စဉ်ဟာ ပြီးခဲ့တဲ့ မတ်လ ၂၁ ရက် ညပိုင်းက ခြံမှာ အိပ်နေစဉ် သတ်ခံရတာဖြစ်ပြီး သားအဖနှစ်ဦး သတ်ခံရတာကို ပြီးခဲ့တဲ့ မတ်လ ၂၈ ရက် တစ်ပတ်အကြာမှ မိသားစုဝင်က သိရတယ်လို့ ဆိုပါတယ်။
“သူတို့နှစ်ယောက်က ခြံမှာ အိပ်ဝာာ။ သောကြာနေ့တိုင်း အိမ်ကို ပြန်လာတယ်။ ပြီးခဲ့တဲ့ သောကြာနေ့က ပြန်လာတယ်။ အဲဒီပြန်သွားတဲ့ညမှာဘဲ အသတ်ခံရတယ်လို့ ယူဆပါတယ်။ ဒီတစ်ပတ် သောကြာ မလာတော့ သွားကြည့်တာ။ နှစ်ယောက်လုံး ဓားဒဏ်ရာတွေနဲ့ အလောင်းတွေလည်း ပုတ်ပွကုန်တာ”
သတ်ခံရတဲ့နှစ်ဦးဟာ စိုင်းတူးခေါ် မောင်မောင်လွင် (၆၃ နှစ်)နဲ့ သားဖြစ်သူ သော်ဇင်မင်းမြတ် (၁၀ နစ်)တို့ဖြစ်ပြီး လိုင်စင်ကား တစ်စီးကိုလည်း ယူဆောင်သွားခဲ့တယ်လို့ အထက်ပါ မိသားစုဝင်က ပြောပါတယ်။
“သားအဖကို ဓားပြတိုက် အတင်းအဓမ္မ လုယက်ယူဆောင်သွားတဲ့ပုံစံပဲ။ ဓားဒဏ်ရာနဲ့ လည်ပင်းမှာ တွေ့ရပါတယ်။ အဖေဆီက ဓားဒဏ်ရာ အများဆုံး တွေ့ရတယ်။ ရှမ်းလိုင်စင် Nissan အမည်ပေါက်နဲ့ Navara ၁ စီးကိုလည်း ယူဆောင်သွားတယ်”
ကျူးလွန်သူတွေ ယူဆောင်သွားတဲ့ ကားကို သက်ဆိုင်ရာ အဖွဲ့အစည်းတွေအနေနဲ့ တွေ့ရင် ဖမ်းဆီးပေးဖို့ တောင်းဆိုထားကြပြီး ကားကိုမိရင် တရားခံတွေလည်း မိလောက်တယ်လို့လည်း ဆိုပါတယ်။
ပြီးခဲ့တဲ့ ဖေဖော်ဝါရီ ၂၃ ရက် လားရှိုးဘက်ကနေ ကားနဲ့ တင်လာတဲ့ သတ်ဖြတ်ခံရတဲ့ အမျိုးသမီးအလောင်း ၃ လောင်းကို သီပေါမြို့နယ် နားမခေါ်ကျေးရွာအနီးက တာလုံလမ်းအဆင်းမှာ လာရောက် စွန့်ပစ်ခဲ့တဲ့ဖြစ်စဥ်လည်း ရှိခဲ့ဖူးပါတယ်။
