မိုင်းရူပ၊ မတ်လ ၂၇ ရက်၊ နောင်ချို
တအာင်းတပ်မတော်- TNLA ထိန်းချုပ်ထားတဲ့ ရှမ်းမြောက် နောင်ချိုမြို့နယ်ထဲ လေကြောင်းနဲ့ ဗုံးကြဲတိုက်ခိုက်မှုမှာ အရပ်သား ၄ ဦး သေဆုံးကာ ၄ ဦး ဒဏ်ရာ ရခဲ့တယ်လို့ မြေပြင်အခြေအနေ သိရှိသူတွေက ရွှေဖီမြေကို ပြောပါတယ်။
မနေ့ မတ်လ ၂၆ ရက် ည ၆ နာရီခွဲဝန်းကျင်မှာ စစ်တပ်က အုမ္မခါး၊ သုံးဆယ်နဲ့ ရွှေညောင်ပင်ရွာတွေကို ဂျက်ဖိုက်တာ ၂ စီး အသုံးပြုပြီး ဗုံး ၅ ကြိမ် ကြဲချတိုက်ခိုက်ခဲ့တာပဲ ဖြစ်ပါတယ်။
လေကြောင်း တိုက်ခိုက်မှုကြောင့် သုံးဆယ်ရွာက အမျိုသား ၂ ဦးနဲ့ အမျိုးသမီး ၂ ဦး သေဆုံးပြီး အုမ္မခါးရွာမှာ အရပ်သား ၄ ဦး ထိခိုက်ဒဏ်ရာ ရခဲ့ပါတယ်။
“သေတဲ့အထဲမှာ အမျိုးသား ၂ ယောက်၊ အမျိုးသမီး ၂ ယောက် ပါတယ်။ မိသားစုလိုက် ထိတာ။ အုမ္မခါးရွာမှာက ၄ ယောက် ဒဏ်ရာ ရတယ်” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
ရွှေဖီမြေကို ပေးပို့လာတဲ့ သေဆုံးသူတွေရဲ့ ဓာတ်ပုံထဲ ခန္ဓာကိုယ် အပိုင်းအစ ဖြစ်သွားတဲ့သူတွေလည်း ရှိနေပါတယ်။
နောင်ချို့မြို့ကို TNLA ထိန်းချုပ်ပြီးနောက် စစ်တပ်ဟာ ဗုံးကြဲတိုက်ခိုက်မှု မကြာခဏ ပြုလုပ်နေတယ်လို့ ဒေသခံတွေက ပြောပါတယ်။
ပြီးခဲ့တဲ့ မတ်လ ၁၆ ရက် ညနေပိုင်းကလည်း နောင်ချိုမြို့ပေါ်ရှိ စိန်ရတနာ ပရိယတ္တိ စာသင်တိုက်ကို ဂျက်လေယာဉ်နဲ့ ဗုံးကြဲတိုက်ခိုက်ခဲ့ရာ ကိုရင်အပါအဝင် သေဆုံးသူ ၁၀ ဦးနဲ့ ဒဏ်ရာရသူ ၁၈ ဦး ရှိခဲ့ပါတယ်။
ဒါ့အပြင် ပြီးခဲ့တဲ့ မတ်လ ၂၂ ရက်မှာ နောင်ချိုမြို့နယ် အုမ္မခါးရွာထဲ စစ်တပ်က ဒရုန်းနဲ့ ဗုံး ၄ လုံး ထပ်မံ ကြဲချတိုက်ခိုက်ခဲ့ရာ အရပ်သားတစ်ဦး ဒဏ်ရာ ရခဲ့ပါတယ်။
နောင်ချိုမြို့နယ် တောင်းခမ်းနဲ့ အုမ္မတီးရွာမှာတော့ စစ်တပ်နဲ့ TNLA တို့အကြား တိုက်ပွဲ ဆက်လက် ပြင်းထန်နေပါတယ်။
