မိုင်းရူပ၊ မတ်လ ၂၆ ရက်၊ နောင်ချို
ရှမ်းမြောက် နောင်ချိုမြို့နယ်ရှိ တအာင်းတပ်မတော်- TNLA ရဲ့ တပ်စခန်းတွေကို စစ်ကောင်စီတပ်က ဆက်လက် ထိုးစစ်ဆင် တိုက်ခိုက်နေပြီး နောင်ချိုတိမ်ပင်လယ်ကို စစ်တပ်က ပြန်သိမ်းနိုင်ခဲ့တယ်လို့ ရှေ့တန်းသတင်းအရင်းအမြစ်တွေက ရွှေဖီမြေကို ပြောပါတယ်။
စစ်တပ်ဟာ နောင်ချိုမြို့နယ် တောင်းခမ်းရွာကနေ TNLA တပ်စခန်းကို ထိုးစစ်ဆင် တိုက်ခိုက်နေတာဖြစ်ပြီး မနေ့ မတ်လ ၂၅ ရက်မှာ မဲပုတ်ရွာအနီးရှိ နောင်ချိုတိမ်ပင်လယ်ကို စစ်ကောင်စီတပ်က ပြန်သိမ်းနိုင်ခဲ့တာလို့ ဆိုပါတယ်။
“စစ်ကောင်စီက ဆက်တိုက် ထိုးစစ် လုပ်နေတာ။ ဒီနောက်ပိုင်း စစ်ကြောင်းတွေ ခွဲပြီး ထိုးနေတာ။ အခုက နောင်ချို တိမ်ပင်လယ်ကို စစ်ကောင်စီက ပြန်ရသွားပြီ” လို့ ရှေ့တန်းသတင်းအရင်းအမြစ်တစ်ဦးက ရွှေဖီမြေကို ပြောပါတယ်။
စစ်တပ်ဟာ နောင်ချို-တောင်းခမ်း လမ်းမကြီးကို ထိန်းချုပ်နိုင်ဖို့ ကြိုးစားနေပြီး နောင်ချိုတိမ်ပင်လယ်ကို စစ်ကောင်စီတပ်က ပြန်လည်သိမ်းပိုက်နိုင်တာကြောင့် နောင်ချိုမြို့နဲ့ ၁၀ မိုင်ကျော်သာ ကွာဝေးပါတယ်။
တောင်းခမ်း တိုက်ပွဲမှာ စစ်တပ်ဘက်က လက်နက်ကြီးနဲ့ ဒရုန်းတွေကို ပိုမိုအသုံးပြုလာခဲ့ပြီး တစ်ရက်ကို အနည်းဆုံး ဗုံး ၁၀၀ ကျော် ကြဲချတိုက်ခိုက်ခဲ့ကာ အဆိပ်ငွေ့ဗုံးနဲ့ပါ တိုက်ခိုက်ခဲ့ပါတယ်။
တောင်းခမ်းရွာမှာ စစ်ကောင်စီရဲ့ အမြှောက်တပ်စခန်းကွပ်ကဲမှုဌာနချုပ်အပါအဝင် အမြှောက်တပ်တပ်စခန်းတွေဖြစ်တဲ့ ၃၅၄၊ ၂၀၆ နဲ့ ၄၀၆ တပ်တွေ အခြေချ တပ်စွဲထားပြီး လက်ရှိမှာ အဲဒီတပ်စခန်းတွေကို စစ်တပ်က ပြန်လည် ထိန်းချုပ်နိုင်ခဲ့ပါတယ်။
နောင်ချိုမြို့ကိုတော့ ပြီးခဲ့တဲ့ ၂၀၂၄ ဇူလိုင် ၁၀ ရက်ကတည်းက TNLA နဲ့ ပူးပေါင်းတပ်တွေက တိုက်ခိုက်သိမ်းပိုက်နိုင်ခဲ့တာ ဖြစ်ပါတယ်။
