ယာရူစိင်၊ မတ်လ ၂၄ ရက်၊ လားရှိုး
ကိုးကန့်တပ်မတော် ထိန်းချုပ်ထားတဲ့ လားရှိုးမြို့မှာရှိတဲ့ KTV နဲ့ အနှိပ်ခန်းမှာ အလုပ် လုပ်နေတဲ့ ဝန်ထမ်းတွေကို ကိုးကန့်တပ်ရဲ့ ကျန်းမာရေးဌာနက ကာကွယ်ဆေး ထိုးပေးနေပါတယ်။
ပြီးခဲ့တဲ့ မတ်လ ၁၃ ရက်ကစပြီး KTV၊ အနှိပ်ခန်းမှာရှိတဲ့ ဖျော်ဖြေရေး ဝန်ထမ်းအတွက် ဆောင်ရွက်ပေးနေသလို အသည်းရောင်အသားဝါ ဘီ၊ စီ၊ HIV၊ ကာလသားရောဂါ စစ်ဆေးပေးနေသလို TB ရောဂါ ရှိမရှိ ဓာတ်မှန် ရိုက်ပေးပြီး ကာလသားရောဂါ ရှိသူကိုလည်း ဆေးကုသပေးနေပါတယ်။
“ဒီလုပ်ငန်းတွေက ပိတ်သိမ်းဖို့ မဖြစ်နိုင်တဲ့ အနေအထားတစ်ခုမလို့ပေါ့နော်။ အရင် စစ်ကောင်စီ လက်ထက်ကတည်းက ဖွင့်ထားတာဆိုတော့လေ။ အဲလိုအခြေအနေတွေကြောင့်မလို့ပါ။ ဒါကြောင့် ဝန်ဆောင်မှုတစ်ခုအနေနဲ့ ပေးတာပေါ့။ ကာကွယ်ဆေး ထိုးပေးတာက နောက်ဆုံးရက်ဆိုပြီး သတ်မှတ်ထားတာ မရှိပါဘူး” လို့ လားရှိုးမြို့ ပြန်လည်ထူထောင်ရေးမှ တာဝန်ရှိသူတစ်ဦးက ရွှေဖီမြေကို ပြောပါတယ်။
ဆေး စစ်တာတွေအတွက် ကုန်ကျစရိတ်ကိုတော့ ဆိုင်ပိုင်ရှင်တွေဘက်က ကုန်ကျခံပေးရတယ်လို့ လားရှိုး ပြန်လည်ထူထောင်ရေးမှ တာဝန်ရှိသူတစ်ဦးက ပြောပါတယ်။
ပြည့်တန်ဆာလုပ်ငန်းမှာ အလုပ် လုပ်ကိုင်နေသူတွေကို ရောဂါ စစ်ဆေးပေးပြီ ရောဂါပိုး တွေ့ရှိသူကို အလုပ်ကနေ နားခိုင်းပြီး ရောဂါပိုး မတွေ့ရှိတဲ့သူကတော့ အလုပ်လုပ်ခွင့် ၃ လကဒ် ထုတ်ပေးပြီး ဆက်လက် အလုပ် လုပ်ကိုင်ဖို့ ခွင့်ပြုပေးထားတယ်လို့ ဆက်ပြောပါတယ်။
ပြီးခဲ့တဲ့ မတ်လ ၄ ရက်ကနေ ၇ ရက်အထိ လားရှိုးမြို့မှာ နေထိုင်တဲ့ အသက်အရွယ်မရွေး မျက်စိအတွင်းတိမ်သူ ၈ဝ ဦးကိုလည်း ကိုးကန့်တပ်ရဲ့ ကျန်းမာရေးဌာနက အခမဲ့ ခွဲစိတ်ကုသမှု ပြုလုပ်ပေးခဲ့ပါတယ်။
လားရှိုးမြို့ကို ပြီးခဲ့တဲ့ ၂၀၂၄ ဩဂုတ် ၃ ရက်မှာ MNDAA နဲ့ ပူးပေါင်းတပ်ဖွဲ့က တိုက်ခိုက်သိမ်းပိုက်ပြီး MNDAA က စီမံအုပ်ချုပ်နေတာပဲ ဖြစ်ပါတယ်။
