မိုင်းပန်ပျော်၊ မတ်လ ၂၁ ရက်၊ နမ္မတူ
သတင်းဓာတ်ပုံ
တအာင်းတပ်မတော်-TNLA ထိန်းချုပ်ထားတဲ့ ရှမ်းမြောက် နမ္မတူမြို့ မြို့မဈေးထဲမှာ သက်တမ်းကုန်တဲ့ စားသောက်ကုန်၊ အလှကုန်နဲ့ ဆေးဝါးတွေကို မြို့နယ် ပြန်လည်ထူထောင်ရေး ကော်မတီက ဒီနေ့ မတ်လ ၂၁ ရက် မနက်ပိုင်းမှာ လိုက်လံစစ်ဆေးတာတွေ ပြုလုပ်ခဲ့ပါတယ်။
ဒီစစ်ဆေးမှုဟာ ပထမအကြိမ်ဖြစ်ပြီး သက်တမ်းကုန်တဲ့ ကုန်ပစ္စည်းတွေ ရောင်းချနေတဲ့ ဆိုင်ပိုင်ရှင်တွေကို အပြစ်ပေး အရေးယူတာ မရှိသေးပေမယ့် နောက်ပိုင်းတွေမှာ သက်တမ်းကုန်တဲ့ ကုန်ပစ္စည်းတွေ ထပ်မံရောင်းချတာတွေ တွေ့ရှိရင် အရေးယူသွားမယ်လို့ သိရပါတယ်။
လက်ရှိမှာ စစ်ဆေးတွေ့ရှိထားတဲ့ သက်တမ်းကုန်နေတဲ့ အလှကုန်၊ ဆေးဝါးနဲ့ စားသောက်ကုန်တွေကို မီးရှို့ဖျက်စီးပစ်မယ်လို့ ဆိုပါတယ်။
ရဲတပ်ဖွဲ့တွေ လိုက်လံစစ်ဆေးခဲ့တဲ့ နမ္မတူမြို့မဈေးထဲက ကုန်စုံဆိုင်တွေထဲမှာ ပြီးခဲ့တဲ့ ၂၀၁၉ ခုနှစ်တွေမှာ ထုတ်လုပ်ပြီး ၂၀၂၂ နဲ့ ၂၀၂၃ ခုနှစ်မှာ သက်တမ်းကုန်နေတဲ့ စားသောက်ကုန်တွေကိုလည်း တွေ့မြင်ရပါတယ်။
နမ္မတူမြို့ဟာ ၁၀၂၇ စစ်ဆင်ရေး ပထမလှိုင်းမှာ တအာင်းတပ်မတော် TNLA က တိုက်ခိုက်သိမ်းပိုက်ပြီး အုပ်ချုပ်ရေးယန္တရားတွေ ဖော်ဆောင်နေတဲ့ မြို့တစ်မြို့လည်း ဖြစ်ပါတယ်။
