ပို့လဘား၊ မတ်လ ၁၇ ရက်၊ မူဆယ်
ညီနောင်မဟာမိတ် (၃) ဖွဲ့ ပူးပေါင်းထိန်းချုပ်ထားတဲ့ ရှမ်းမြောက် မူဆယ် (၁၀၅) မိုင်မှာ ပြည်သူ့ကာကွယ်ရေးတပ်ဖွဲ့ (PDF) တွေက အချင်းချင်း စကားများ ရန်ဖြစ်ရာကနေ ဓားထိုးမှု ဖြစ်ပွားခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ မတ်လ ၁၅ ရက် မနက် ၈ နာရီအချိန်မှာ (၁၀၅) မိုင် ကုန်သွယ်ရေးဇုန်အတွင်းမှာရှိတဲ့ အမျိုးသားညီညွတ်ရေးအစိုးရ (NUG) လက်အောက်ခံ ပြည်သူ့ကာကွယ်ရေးအဖွဲ့ (ပကဖ) ၂ ဦးနဲ့ TNLA ရဲ့ လမ်းညွှန်မှုနဲ့ လှုပ်ရှားနေတဲ့ Local PDF တစ်ဦးတို့က အလုပ်ကိစ္စ ပြောဆိုဆွေးနွေးရာကနေ အခုလို ဖြစ်ပွားခဲ့တာ ဖြစ်ပါတယ်။
“အစက သူတို့အလုပ်ကိစ္စနဲ့ လာပြောကြတယ်။ ပြီးမှ စကားများ ရန်ဖြစ်ပြီး သူတို့နှစ်ယောက်(ပကဖ)က အဲဒီ PDF ရဲ့ လည်ပင်းနဲ့ ကျောကုန်းကို ဓားနဲ့ထိုးတာ။ သူ့ရဲ့ (ဓားထိုးခံရတဲ့ PDF) မိန်းမကိုကျတော့ သူတို့ လည်ပင်းညှစ်လိုက်တယ်။ တခြားသူတွေ ဝင်တားတဲ့အချိန်မှာ အဲနှစ်ယောက်က တံခါးပိတ်လိုက်ပြီး ထွက်ပြေးသွားတယ်”
ဓားထိုးခံရသူ အမျိုးသားဟာ အသက် ၂၂ နှစ်အရွယ်ရှိတဲ့ Local PDF တစ်ဦးဖြစ်ပြီး ဓားထိုးခံရတာအပြင် ရိုက်နှက်နှိပ်စက်တာလည်း ခံရတယ်လို့ ပြောပါတယ်။
၎င်းရဲ့ သေနတ်တစ်လက်၊ ဆိုင်ကယ်တစ်စီး၊ ဖုန်း ၂ လုံး၊ PDF ယူနီဖောင်းတစ်စုံနဲ့ ငွေသားတချို့ကိုလည်း ဓားထိုးတဲ့ အဲဒီ PDF နှစ်ဦးက ယူဆောင်ပြီး ထွက်ပြေးသွားခဲ့တယ်လို့ ဆိုပါတယ်။
လက်ရှိမှာ ဓားထိုးခံခဲ့ရတဲ့ အဲဒီအမျိုးသားက ဆေးကုသမှု ခံယူနေရပြီး ထွက်ပြေးသွားတဲ့ ပ-က-ဖ အဖွဲ့ဝင်နှစ်ဦးကိုတော့ TNLA ရဲ့ တရားဥပဒေ စိုးမိုးရေးတပ်ဖွဲ့နဲ့ သက်ဆိုင်ရာ တာဝန်ရှိသူတွေက လိုက်လံရှာဖွေနေဆဲ ဖြစ်တယ်လို့ သိရပါတယ်။
