မိုင်းရူပ၊ မတ်လ ၁၇ ရက်၊ နောင်ချို
တအာင်းတပ်မတော်-TNLA ထိန်းချုပ်ထားတဲ့ ရှမ်းမြောက် နောင်ချိုမြို့ပေါ်ရှိ ဘုန်းကြီးကျောင်း ဗုံးကြဲခံရမှုမှာ ဒဏ်ရာပြင်းထန်တဲ့ ကိုရင်တွေထဲက ၁ပါး ထပ်မံပျံလွန်တော်မူခဲ့ပြီး သေဆုံးသူ ၁၅ ဦးအထိ ရှိလာပြီဖြစ်တယ်လို့ မြေပြင်အခြေအနေသိရှိသူတွေက ရွှေဖီမြေကို ပြောပါတယ်။
မနေ့ မတ်လ ၁၆ ရက် ညနေ ၅ နာရီခွဲအချိန်မှာ နောင်ချိုမြို့မှာရှိတဲ့ စိန်ရတနာ ပရိယတ္တိစာသင်တိုက်ကို စစ်ကောင်စီတပ်က လေယာဉ်နဲ့ ဗုံးကြဲတိုက်ခိုက်ခဲ့ရာ ကိုရင် ၈ ပါး နဲ့ ဦးဇင်းတစ်ပါးအပါအဝင် ၁၄ ဦး သေဆုံးခဲ့ပြီး ၆ ဦးထိခိုက်ဒဏ်ရာရခဲ့တာ ဖြစ်ပါတယ်။
“ကိုရင်တစ်ပါး ထပ်ပြီးပျံလွန်တော်မူသွားပြီ။ ဒဏ်ရာရတဲ့ ၆ ဦးထဲမှာ ၅ ဦးက ဒဏ်ရာပြင်းထန်တယ်” လို့ ဒဏ်ရာရသူကို ကူညီပေးနေသူတစ်ဦးက ရွှေဖီမြေကို ပြောပါတယ်။
ဒီနေ့ မတ်လ ၁၇ရက်နေ့မှာလည်း နောင်ချိုမြို့ ကျောက်ကြမ်းဘက်ကို လေကြောင်းကနေ ဗုံးကြဲတိုက်ခိုက်တာတွေ ပြုလုပ်ခဲ့ပြီး ထိခိုက်သေဆုံးမှုကတော့ မသိရသေးပါဘူး။
နောင်ချိုမြို့ကို TNLA သိမ်းပြီးနောက် စစ်ကောင်စီတပ်က မြို့ပေါ်ကို လေကြောင်းနဲ ဆယ်ကြိမ်ထက်မနည်း တိုက်ခိုက်ခဲ့ပြီး သေဆုံးသူနဲ့ ဒဏ်ရာရတဲ့အရပ်သား အများအပြားရှိခဲ့ပါတယ်။
ပြီးခဲ့တဲ့ မတ်လ ၁၄ ရက်ကလည်း နောင်ချိုမြို့နယ် ယာပြင်ကျေးရွာကို စစ်ကောင်စီက ဒရုန်းနဲ့ ဗုံးကြဲတိုက်ခိုက်ခဲ့ရာ အရပ်သား ၃ ဦးသေဆုံးပြီး ၅ ဦးဒဏ်ရာရခဲ့ပါတယ်။
နောင်ချိုမြို့နယ် တောင်းခမ်းနဲ့ အုမ္မတီးကျေးရွာတွေမှာတော့ စစ်ကောင်စီနဲ့ TNLA အကြား တိုက်ပွဲပြင်းထန်နေပြီး စစ်ကောင်စီတပ်ဘက်က လေကြောင်းတိုက်ခိုက်မှုတွေ နေ့စဥ်လိုလို ပြုလုပ်နေပါတယ်။
TNLA တပ်ဘက်ကတော့ စစ်ကောင်စီတပ်ဟာ အရပ်သားတွေကို ရည်ရွယ်ချက်ရှိရှိ ဗုံးကြဲတိုက်ခိုက်နေပြီး လူထုတွေအနေနဲ့ စစ်ရေးသတိရှိကြဖို့ တိုက်တွန်းထားပါတယ်။
