လွေးထွေး၊ မတ်လ ၁၆ ရက်၊ ပြင်ဦးလွင်
မန္တလေးတိုင်း ပြင်ဦးလွင်မြို့နဲ့ ရှမ်းမြောက် နောင်ချိုမြို့နယ်ကြားမှာ နောက်ထပ်အမျိုးသားတစ်ဦး ထပ်မံပျောက်ဆုံးနေတယ်လို့ မိသားစုဝင်တွေက ပြောပါတယ်။
ပြီးခဲ့တဲ့ မတ်လ ၆ ရက် မနက်မှာ လားရှိုးမြို့ကို လာဖို့ ဆိုင်ကယ်နဲ့ ပြင်ဦးလွင်မြို့ကနေ ထွက်လာပြီးနောက် ညနေ ၄ နာရီ ဝန်းကျင်မှာ နောက်ဆုံးဖုန်းအဆက်အသွယ်ရခဲ့တာလို့ ဇနီးဖြစ်သူက ဆိုပါတယ်။
မိသားစုဝင်တစ်ဦးက “ဆိုင်ကယ်နဲ့ထွက်သွားတာ။ တစ်ယောက်ထဲဘဲ။ လမ်းရောက်တော့ သူ့မိန်းမကို ဖုန်းပြန်ဆက်လာတယ်။ ဆိုင်ကယ် ၃ စီးတောင် အဖော်ရှိတယ်။ နောင်ချိုရောက်ခါနီးပြီတဲ့။ အဲည ၁၂ နာရီလောက်မှာ သူ့အကောင့်က မီးစိမ်းတယ်။ စကားပြောတော့ စာပြန်ပို့လာတယ် ။ စာလုံးပေါင်း မမှန်နေဘူး။ အဲဒါပြီးတော့ ဆက်သွယ်လို့ကို မရတော့ဘူး။ လားရှိုးလည်းမရောက်ဘူး” လို့ ပြောပါတယ်။
လားရှိုးဇာတိဖြစ်တဲ့ ၎င်းအမျိုးသားဟာ အသက် ၄၅ နှစ်အရွယ်ရှိတဲ့ စောလွယ်စေးဆိုသူဖြစ်ပြီး မတ်လ ၆ ရက်ကနေ ဒီနေ့ မတ်လ ၁၆ ရက်အထိ အဆက်အသွယ် ပြတ်တောက်သွားတာကြောင့် မိသားစုဝင်တွေက စိတ်ပူနေကြတယ်လို့ ဆိုပါတယ်။
အလားတူ ပြီးခဲ့တဲ့ မတ်လ ၃ ရက်ကလည်း မန္တလေးတိုင်း ပြင်ဦးလွင်နဲ့ ရှမ်းမြောက် နောင်ချိုမြို့ကြားက ဝက်ဝံဂိတ်အနီးမှာ နမ္မတူမြို့က အမျိုးသားတစ်ဦး ပျောက်ဆုံးသွားခဲ့ပြီး မတ်လ ၁၃ ရက်မှာ နေအိမ်သို့ ပြန်ရောက်လာခဲ့ပါတယ်။
လတ်တလောအတွင်း ပြင်ဦးလွင်နဲ့ နောင်ချိုကြားမှာ စစ်ကောင်စီတပ်နဲ့ TNLA တို့ တိုက်ပွဲနေ့စဉ်ဖြစ်ပွားနေပြီး စစ်ကောင်စီတပ်ကလည်း မြေပြင်ကနေ ထိုးစစ်ဆင်နေတာကြောင့် လမ်းမှာ TNLA နဲ့ တော်လှန်ရေးတပ်တွေက စစ်ဆေးမှုတင်းကြပ်နေတယ်လို့ ခရီးသည်တွေရဲ့ပြောပြချက်အရ သိရပါတယ်။
