ပို့လဘား၊ မတ်လ ၁၄ ရက်၊ ကျောက်မဲ
ရှမ်းမြောက် ကျောက်မဲမြို့ထဲက သီလရှင်ကျောင်းတစ်ကျောင်း မီးလောင်မှု ဖြစ်ပွားခဲ့တယ်လို့ ကျောက်မဲဒေသခံတစ်ဦးက ပြောပါတယ်။
မနေ့ မတ်လ ၁၃ ရက် ညနေ ၆ နာရီဝန်းကျင်မှာ ကျောက်မဲမြို့ အင်ကြင်းတောင်မှာရှိတဲ့ ကျောင်းတစ်ကျောင်းမှာ သီလရှင်တစ်ပါးက ဘုရားကျောင်းဆောင်အတွင်း ဖယောင်းတိုင်မီး ထွန်းရာကနေ မီးလောင်မှု ဖြစ်ပွားခဲ့တာပါ။
“သီလရှင်ကျောင်းမှာ သူ(မယ်သီလရှင်)က ဖယောင်းတိုင် ထွန်းထားပြီး ကျောင်းထဲ ဝင်သွားတာ။ ဖယောင်းတိုင် လဲပြီး စလောင်တော့တယ်လို့ ပြောတယ်။ ဆုံးရှုံးမှု ပမာဏကိုတော့ မသိရဘူး”
မီးလောင်မှုကြောင့် ဆန်၊ ဆီနဲ့ အသုံးအဆောင်ပစ္စည်း ဆုံးရှုံးခဲ့ပြီး မီးလောင်ဆုံးရှုံးသွားတဲ့ တန်ဖိုးဟာ ကျပ်သိန်းပေါင်း ၁၈၀ ကျော် ရှိတယ်လို့ တအာင်းတပ်မတော်ရဲ့ သတင်းနဲ့ပြန်ကြားရေးဌာန ထုတ်ပြန်ချက်အရ သိရပါတယ်။
ပြီးခဲ့တဲ့ မတ်လ ၁၀ ရက်ကလည်း နမ့်ခမ်းမြို့နယ် ဖာပြန့်ကျေးရွာမှာ ဓာတ်ခဲ ပေါက်ကွဲမှု ဖြစ်ပွားရာကနေ နေအိမ်တစ်လုံး မီးလောင်ပြာကျခဲ့ပါတယ်။
