မြတ်နိုး၊ မတ်လ ၁၁ ရက်၊ ဗန်းမော်
ကချင်ပြည်နယ် ဗန်းမော်မြို့မှာ မတ်လ ၈ ရက်နဲ့ ၉ ရက်နေ့ နှစ်ရက်တာ တိုက်ပွဲအတွင်း ကချင်တပ်မတော်- KIA နဲ့ တော်လှန်ရေး ပူးပေါင်းတပ်ဖွဲ့က စစ်ကောင်စီတပ်ရဲ့ ဒရုန်းတချို့ကို ပစ်ချနိုင်ခဲ့ပြီး ကာကင်းစခန်းတချို့လည်း သိမ်းပိုက်ရရှိထားကြောင်း ရှေ့တန်း သတင်းရင်းမြစ်တွေဆီက သိရပါတယ်။
“မတ်လ ၉ ရက်က ဗန်းမော် တိုက်ပွဲမှာ စစ်ကောင်စီရဲ့ အရေးပါတဲ့ နေရာတချို့ကို သိမ်းပိုက်နိုင်ခဲ့တယ်။ စစ်ကောင်စီရဲ့ ဒရုန်း ၇ စီးလည်း ပစ်ချနိုင်ခဲ့တယ်။ တိုက်ပွဲကတော့ အခုထိ ဆက်ပြီး ပြင်းထန်နေတုန်းပဲ” လို့ ရှေ့တန်းနဲ့ နီးစပ်သူ သတင်းရင်းမြစ်တစ်ဦးက ရွှေဖီမြေကို ပြောပါတယ်။
အဲဒီ ဒရုန်း ၇ စီးထဲ ညသုံးဒရုန်း အပူချိန်နဲ့ လှုပ်ရှားမှုကို အာရုံခံတဲ့ ဒရုန်းတွေလည်းပါဝင်ကြောင်း သူက ပြောပါတယ်။
“ဗန်းမော်မှာ တော်လှန်ရေးတပ်ဘက်က နေရာနည်းနည်း ပြန်ထပ်သိမ်းရပြီ။ စကခ ၂၁ အနီးက ကာကင်းတချို့ ပြန်တိုက်နိုင်ခဲ့တာ။ ၃ မိုင်၊ ၄ မိုင်တွေဘက်တော့ မတိုက်ရသေးဘူး” လို့ ရှေ့တန်းနဲ့ နီးစပ်တဲ့ အမျိုးသမီးတစ်ဦးက ပြောပါတယ်။
ပစ်ချနိုင်ခဲ့တဲ့ ဒရုန်းတွေက စကခ ၂၁ ရဲ့ ဒရုန်းအကြီးတွေ ဖြစ်တယ်လို့ သိရကြောင်း သူမက ပြောပါတယ်။
စစ်တပ်ဘက်ကတော့ မြေပြင် ခြေလျင်ထက် ဝေဟင်ကနေ ဒရုန်း၊ လေယာဉ်နဲ့သာ ပြင်းပြင်းထန်ထန် ခုခံတိုက်ခိုက်နေပြီး မတ်လ ၉ ရက်မှာ Y-12, MiG-29, Yak-130 နဲ့ ၁၀ ကြိမ်ထက်မနည်း လေကြောင်း ဗုံးကြဲ တိုက်ခိုက်ခဲ့တယ်လို့ ဆိုပါတယ်။
စစ်တပ်စခန်း ရာချီရှိတဲ့ ဗန်းမော်ကို ပြီးခဲ့တဲ့ ၂၀၂၄ ဒီဇင်ဘာလကစ KIA နဲ့ ပူးပေါင်းတော်လှန်ရေးတပ်ဖွဲ့က ထိုးစစ်ဆင် တိုက်ခိုက်နေတာ ဖြစ်ပါတယ်။
