ယာရူစိင်၊ မတ်လ ၇ ရက်၊ သိန္နီ
ကိုးကန့်တပ်(MNDAA) ထိန်းချုပ်ထားတဲ့ သိန္နီမြို့အထွက် တိုးဂိတ်မှာ ပြီးခဲ့တဲ့ မတ်လ ၃ ရက်က ဆီတင်တဲ့ ၁၂ ဘီးကား ၁စီးကို ကိုးကန့်တပ်က သိန်း ၁၀၀နီးပါးထိ ငွေ အဆမတန် ကောက်ခံနေတာကြောင့် လက်ရှိမှာ စက်သုံးဆီတင်ကားတွေ ယာယီရပ်နားထားရတယ်လို့ ရွှေဖီမြေမှ စုံစမ်းသိရှိရပါတယ်။
အခုလို ကိုးကန့်တပ်က ငွေ အဆမတန် ကောက်ခံနေတာကြောင့် မတ်လ ၄ ရက်ကစပြီ ဒီနေ့ မတ်လ ၇ ရက်အထိ စက်သုံးဆီတင်ကားတွေ သွားလာနေတာ မရှိတော့ဘူးလို့ မြေပြင်အခြေအနေ သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
“ဆီတင်တဲ့ ကားတွေလဲ ဘယ်သူမှ မလာရဲတော့ဘူး ဖြစ်နေတယ်။ သူတို့ တောင်းတဲ့ ငွေပမာဏက ဘယ်သူ့အတွက်မှ အဆင်မပြေကြဘူးလေ။ အရင်က ပေးဆောင်ရတဲ့ ငွေပမာဏက အဆင်ပြေတယ်လို့လဲ မဟုတ်ပေမဲ့ နည်းနည်းတော့ သက်သာတယ်ပေါ့။ ခုကျ သိန်းရာချီနီးပါးဆိုတာ များတယ်လေ”
စက်သုံးဆီတင်တဲ့ကားသမားတွေက ငွေ သိန်းရာချီနီးပါး ပေးဆောင်ရမှာ စိုးရိမ်တာကြောင့် ဘယ်ဆီတင်ကားမှ သွားလာတာ မတွေ့ရဘူးလို့ ဆက်ပြောပါတယ်။
နောက်ထပ် မြေပြင်အခြေအနေ သိရှိသူ အမျိုးသားတစ်ဦးက “ဆီတင်ကားတွေလာရင် ငွေ မပေးရင် ပေးမဖြတ်ဘူး။ ပေးရတဲ့ ငွေတွေကလဲ အရမ်းများလို့။ ဘယ်ဆီတင်ကားမှ မတက်လာရင် သေချာပေါက် ဆီဈေးက တက်တော့မှာလေ”လို့ ပြောပါတယ်။
အရင်က ဆီအပြည့်တင်တဲ့ ၁၂ ဘီးကားတစ်စီးကို ငွေ ၂ သိန်းကျပ်ဝန်းကျင်သာ အခွန်ပေးဆောင်ရပေမဲ့ ပြီးခဲ့တဲ့ မတ်လ ၃ ရက်မှာတော့ သိန်းရာချီနီးပါးအထိ အခွန်ကောက်နေတာကြောင့် ဆီကားအချို့ နောက်ပြန်လှည့်ခဲ့ကြရတာ ဖြစ်ပါတယ်။
အခုလို ကိုးကန့်တပ်က စက်သုံးဆီတင်တဲ့ ကားတွေကို အခွန် အဆမတန် ကောက်ခံနေတာဟာ သိန္နီမြို့အထက်မှာရှိတဲ့ နမ့်ခမ်းမြို့နဲ့ ကွတ်ခိုင်မြို့အပြင် ညီနောင်မဟာမိတ် ထိန်းချုပ်ထားတဲ့ ၁၀၅မိုင်မှာလဲ ဆီဈေး အဆမတန် မြှင့်တက်လာမှာကို ဒေသခံတွေက စိုးရိမ်နေကြပါတယ်။
