သူတော်စိန်၊ မတ်လ ၇ ရက်၊ မူဆယ်
ရှမ်းမြောက် တရုတ်- မြန်မာ နယ်စပ်ဖြစ်တဲ့ မူဆယ်မြို့က ဒေသခံတွေစီးနှင်နေတဲ့ လိုင်စင်မဲ့ကား ဒေသခံကားတွေကို ဖမ်းဆီးထားတာရှိနေပြီး ကျားဖြန်လုပ်ငန်း လုပ်ကိုင်တဲ့ တရုတ်တွေကတော့ ကင်းလွတ်ခွင့်ရနေတယ်လို့ လိုင်စင်မဲ့ကားစီးသူတစ်ဦးက ရွှေဖီမြေကို ပြောပါတယ်။
မူဆယ်မြို့မှာရှိတဲ့ တရုတ်နိုင်ငံသား ကျားဖျန်လုပ်ကိုင်သူတွေဟာ လိုင်စင်မဲ့ကားတွေကိုသာ စီးနေပြီး ရဲနဲ့ ပြည်သူ့စစ်အစောင့်အရှောက်တွေနဲ့သာ သွားလာနေကြတာ ဖြစ်ပါတယ်။
“သူတို့က ရဲတွေကို ပေးကမ်းထားတာလေ။ ဘယ်ဖမ်းပါ့မလဲ အပိုင်နယ်ထိန်းဆို ကားထဲကနေ လိုက်ပြီး စောင့်ရှောက်ပေးရတာ။ တရုတ်တွေအတွက် မိန်းမငယ်ငယ်ချောချော တွေကိုဘဲ အပိုင်နယ်ထိန်းက လိုက်ရှာပေးရတာ။ ရဲတွေ ချိန်းခြောက်ပြီး ခေါ်ထားတဲ့ မြန်မာမိန်းကလေးတွေက ကိုးထပ်ကြီးနားမှာ အများကြီးပဲ”လို့ မင်္ဂလာမူဆယ်မှာရှိတဲ့ ဝန်ထမ်းတစ်ဦး ပြောပြချက်အရ သိရပါတယ်။
လိုင်စင်မဲ့ကားတွေကို တရုတ်ပြည် ကျယ်ဂေါင်မှာရှိတဲ့မနောကွင်းအနီး ပွဲစားတန်းမှာ ဝယ်ယူတာဖြစ်ပြီး ဆင်ဖြူဂိတ်မှာ တာဝန်ကျနေတဲ့ ရဲကင်းနဲ့ အပိုင်နယ်ထိန်းတွေကို ငွေပေးမှသာ ထုတ်ရတယ်လို့ ဆိုပါတယ်။
“အာဏာမသိမ်းခင်က ရဲမြို့နယ်မှူးကို ကားပုံနဲ့ ကားမှာတပ်ထားတဲ့ နံပါတ်ကို စာရင်းသွားပေးရတယ်။ ခုတော့ စခန်းမှူးကိုပဲ အသိပေးပြီး နှစ်စဥ်ကြေး ပေးရတယ်။ ကားအမျိုးအစားပေါ်မူတည်ပြီး သိန်း ၂၀ ကနေ ၃၅ သိန်းထိပေးရတယ်”လို့ ပြောပါတယ်။
ဒါ့အပြင် မူဆယ်မြို့မှာရှိတဲ့ လမ်းမကြီးပေါ်မှာလည်း သုံးဘီးနဲ့ အိမ်စီးကားတွေကို စည်းကမ်းမဲ့ ရပ်ထားတာရှိပြီး ယာဉ်ကြောပိတ်ဆို့ခြင်းနဲ့ ဈေးဆိုင်တွေကို ပိတ်ကွယ်ထားတာကြောင့် ယာဉ်ထိန်းရဲတပ်ဖွဲ့ကို ပြီးခဲ့တဲ့ မတ်လ ၁ ရက်က တိုင်ခဲ့ပေမယ့် စခန်းမှူးက တာဝန်ယူဖြေရှင်းပေးတာ မရှိသေးပါဘူး။
မူဆယ်မြို့မှာ လုယက်မှု၊ ပြန်ပေးဆွဲမှုနဲ့ လူသတ်မှုတွေကို ကျူးလွန်တဲ့သူတွေဟာ လိုင်စင်မဲ့ကားကိုသာ အသုံးပြုကြတာဖြစ်ပြီး သက်ဆိုင်ရာတွေကို ငွေပေးနေကြတာကြောင့် ၎င်းအမှုနဲ့ဖြစ်စဉ်တွေဟာ မူဆယ်မြို့မှာ မပပျောက်သေးဘဲ ဆက်ရှိနေသေးတာ ဖြစ်တယ်လို့ အဆိုပါအမျိုးသားက ပြောပါတယ်။
