ယာရူစိင်၊ မတ်လ ၅ ရက်၊ မူဆယ်
စစ်ကောင်စီတပ်ထိန်းချုပ်ထားတဲ့ မြန်မာ-တရုတ်နယ်စပ် မူဆယ်မြို့ ဆင်ဖြူပေါက်မှာ ဆိုင်ကယ်တင်သွင်းခွင့် အခွန်ဆိုပြီး ငွေ အဆမတန် တောင်းနေတယ်လို့ သိရပါတယ်။
အရင်က တရုတ်နယ်စပ်ကနေ မြန်မာနယ်စပ်ဘက်ကို တင်သွင်းလာတဲ့ ဆိုင်ကယ်တစ်စီးကို ယွမ် ၁၀၀ ( ၆ သောင်း)ကျပ်သာပေးရပေမဲ့ လက်ရှိမှာတော့ ယွမ် ၃၀၀ (၁၈၀၀၀၀)ကျပ်အထိ ပေးဆောင်နေရတယ်လို့ မြေပြင်အခြေအနေ သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
“တရုတ်ကနေ ထွက်လာတာ နှစ်မျိုးရှိတယ်။ ဘတ်ထရီဘီးနဲ့ စက်ဘီးပေါ့။ ဘတ်ထရီဘီးကျ တရုတ်ကနေ မြန်မာဘက် တင်သွင်းခွင့်ရတယ်။ ဒါပေမဲ့ လမ်းရှင်းကြေးက အရမ်းများတယ် ဆိုင်ကယ်တွေကို လမ်းကြောင်းရှင်းပေးတဲ့ လမ်းရှင်းကလည်း အရင်က ကုန်သည်တွေဆိုင်ကယ်ကို တာဝန်ယူပြီးထုတ်ပေးတယ်။ ဒီနောက်ပိုင်းကျ သူမထုတ်ပေးတော့ဘူး”
ဆင်ဖြူပေါက်မှာရှိတဲ့ ပြည်သူ့စစ်နဲ့ စစ်တပ်တွေဟာ လူထုဆီ ငွေ အပြည့်အဝကောက်ယူနေပေမဲ့ ဆိုင်ကယ်တင်သွင်းခွင့်ရတဲ့ လူထုတွေရှိသလို တင်သွင်းခွင့်မရတဲ့ လူထုတွေလဲ ရှိနေတယ်လို့ နောက်ထက်မြေပြင်အခြေအနေ သိရှိသူ တစ်ဦးက ပြောပါတယ်။
“သူ့တို့စိတ်ကြိုက် သူတို့လုပ်တယ်။ ဆိုင်ကယ် ထုတ်ပေးချင်ရင် ထုတ်ပေးတယ်ပေါ့။ တခါတလေဆို လူထုတွေက ပိုက်ဆံ အရမ်းရှုံးတယ်လေ။ အရင်ကတော့ အဲလောက် အခွန်ကြေးမပေးရပါဘူး။ အစတုန်းက ၁ သောင်း ၂ သောင်းလောက်ပဲ ပိုပေးရတာ။ ခုက အရမ်းများတယ်လေ”
လက်ရှိမှာတော့ ဆင်ဖြူပေါက်ကနေ စားသုံးကုန်အပြင် အခြားဘာပစ္စည်းမှာ သယ်ယူခွင့်မပြုသေးပေမဲ့ ဆိုင်ကယ်ကိုတော့ တရားဝင် တင်သွင်းခွင့် ပြုထားတာမဟုတ်ကြောင်းကို ဒေသခံတွေ ပြောပြချက်အရ သိရပါတယ်။
ပြီးခဲ့တဲ့ ၂၀၂၄ အောက်တိုဘာ ၂၂ ရက်မှာ မူဆယ်မြို့မှာရှိတဲ့ တရုတ်-မြန်မာ နယ်စပ်ဂိတ်ဖြစ်တဲ့ နန်းတော်ပေါက်နဲ့ ဆင်ဖြူပေါက်ဂိတ်တွေကို တရုတ်က ကုန်ပစ္စည်း တင်းတင်းကြပ်ကြပ်စစ်ဆေးပြီး သယ်ယူခွင့် ပိတ်ပင်ခဲ့တာ ဖြစ်ပါတယ်။
