လွေးထွေး၊ မတ်လ ၂ ရက်၊ နောင်ချို
ရှမ်းမြောက် နောင်ချိုမြို့နယ် တောင်းခမ်းမှာ စစ်ကောင်စီတပ်နဲ့ တအာင်းတပ်မတော်- TNLA တို့ တိုက်ပွဲ နေ့စဉ် ဖြစ်ပွားနေတယ်လို့ ရှေ့တန်း သတင်းအရင်းအမြစ်တစ်ဦးရဲ့ ပြောပြချက်အရ သိရပါတယ်။
မနေ့ မတ်လ ၁ ရက်အထိ မြေပြင်ကနေပါ စစ်တပ်က ထိုးစစ်ဆင် တိုက်ခိုက်နေတာကြောင့် တောင်းခမ်းနဲ့ တောင်ရှည်မှာ တိုက်ပွဲ ဆက်လက် ဖြစ်ပွားနေတာပါ။
မြေပြင်သတင်းအရင်းအမြစ်တစ်ဦးက “တိုက်ပွဲက နေ့တိုင်း ဖြစ်တယ်။ စကစက လက်နက်ကြီးတွေတော့ သုံးတယ်။ လေယာဉ်တော့ မလာတာ ၃၊ ၄ ရက်ရှိပြီ။ မြေပြင်ကနေ စကစက နေ့တိုင်း ထိုးစစ်ဆင်လာတယ်” လို့ ပြောပါတယ်။
တောင်းခမ်းမှာ စစ်တပ်နဲ့ TNLA တို့ ၆ လ နီးပါးကြာ တိုက်ပွဲ ဖြစ်ပွားနေပြီး စစ်ကောင်စီတပ်ဘက်က လေကြောင်းကို အပြင်းအထန် အသုံးပြုခဲ့တာကြောင့် နေရာတချို့ကို TNLA က လက်လွှတ်ခဲ့ရပါတယ်။
တောင်းခမ်းအပြင် တောင်ရှည်နဲ့ ဂန့်ကော်၊ အုမ္မတီး စတဲ့နေရာမှာလည်း ပြီးခဲ့တဲ့ ဖေဖော်ဝါရီ နောက်ဆုံးအပတ်ကလည်း နေ့စဉ် တိုက်ပွဲ ဖြစ်ပွားခဲ့ပါတယ်။
တောင်းခမ်းနဲ့ မိုင် ၂၀ သာဝေးတဲ့ နောင်ချိုမြို့ကိုတော့ ၁၀၂၇ စစ်ဆင်ရေး ဒုတိယလှိုင်းအတွင်း ၂ဝ၂၄ ဇူလိုင် ၁ဝ ရက်မှာ TNLA နဲ့ ပူးပေါင်တပ်က တိုက်ခိုက်သိမ်းပိုက်နိုင်ခဲ့ပြီး လက်ရှိမှာတော့ အုပ်ချုပ်ရေး ယန္တရားတွေ လည်ပတ်နေပါတယ်။
