လွေးထွေး၊ မတ်လ ၁ ရက်၊ ပြင်ဦးလွင်
မန္တလေးတိုင်း ပြင်ဦးလွင်မြို့ပေါ်ရှိ နေအိမ်တချို့က စစ်မှုထမ်း ကင်းလွတ်ခွင့်ရဖို့ ရပ်ကွက်အုပ်ချုပ်ရေးမှူးတွေကို သိန်း ၈၀ ကနေ သိန်း ၁၀၀ ကြားအထိ ပေးနေရတယ်လို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ ဖေဖော်ဝါရီ ဒုတိယအပတ်ကတည်းက ပြင်ဦးလွင်မြို့မှာ စစ်တပ်က စစ်မှုထမ်း အပတ်စဉ်(၁၁)အတွက် စကောက်နေတာ ဖြစ်ပါတယ်။
ဖြစ်စဉ်ကိုသိရှိသူ ပြင်ဦးလွင်မြို့မှ ဒေသခံ အမျိုးသားက “မြို့ပေါ်က ပိုက်ဆံရှိတဲ့ အသိုင်းအဝိုင်းတွေက ပိုက်ဆံ ပေးကြတယ်။ မြို့ပေါ်လည်း ပိုက်ဆံ မရှိရင် ခေါ်သွားတဲ့အထဲ ပါသွားတာဘဲ။ အဓိက အုပ်ကြီးတွေက လုပ်စားနေတာပေါ့” လို့ ရွှေဖီမြေကို ပြောပါတယ်။
ဒါ့အပြင် ညတိုင်း မြို့ပေါ်က ရပ်ကွက်တချို့မှာ စစ်တပ်နဲ့ ရပ်ကွက်အုပ်ချုပ်ရေးမှူးတွေ ပေါင်းပြီး နေအိမ်အထိ ဝင်ရောက်ခေါ်ဆောင်တာအပြင် ဧည့်စာရင်း သွားတိုင်သူတချို့ကိုလည်း ဖမ်းဆီးတာတွေ လုပ်ဆောင်နေကြောင်း သူက ဆက်ပြောပါတယ်။
ပြင်ဦးလွင် ရပ်ကွက်ကြီး ၇ နေ အမျိုးသမီးကလည်း “ဒီတစ်လအတွင်းမှာ သူတို့က တွေ့ရင်တွေ့သလို လူဖမ်းတယ်။ အဓိက စစ်မှုထမ်းဖို့ အရွယ်ကောင်းတဲ့ လူငယ် အမျိုးသားတွေကိုပေါ့။ ရပ်ကွက်ထဲက တချို့ငွေရှိကြတဲ့အိမ်ဆို သွားစရာ မလိုဘူး။ အုပ်ကြီးနဲ့ အဆင်ပြေရင်ကို သွားစရာ မလိုတော့တာ” လို့ ပြောပါတယ်။
လာမယ့် မတ်လအတွင်း စစ်မှုထမ်း အပတ်စဉ်(၁၁)ကို ဖွင့်လှစ်နိုင်ဖို့ စစ်တပ်က ပြင်ဦးလွင်အပြင် ပြည်နယ်နဲ့ တိုင်းတချို့မှာ အရပ်သားတွေကို စစ်မှုထမ်းဖို့ အပူတပြင်း စုဆောင်းနေပါတယ်။
