မိုင်းရူပ၊ ဖေဖော်ဝါရီ ၂၅ ရက်၊ နောင်ချို
ရှမ်းမြောက် နောင်ချိုမြို့နယ် အုမ္မတီးကျေးရွာကို စစ်ကောင်စီတပ်ကလေကြောင်းနဲ့ ထပ်မံတိုက်ခိုက်ခဲ့တယ်လို့ ရွှေဖီမြေက စုံစမ်းသိရှိရပါတယ်။
နောင်ချို-ပြင်ဦးလွင်မြို့နယ်ကြားရှိ အုမ္မတီးကျေးရွာကို စစ်ကောင်စီက မနေ့ ဖေဖော်ဝါရီ ၂၄ ရက်မနက်ပိုင်းမှာ စစ်ကောင်စီတက်က အုမ္မတီးကျေးရွာထဲကို ဂျက်ဖိုက်တာလေယာဥ်နဲ့ ဗုံးကြဲတိုက်ခိုက်ခဲ့တာဖြစ်တယ်လို့ မြေပြင်အခြေအနေသိရှိသူ တစ်ဦးက ရွှေဖီမြေကို ပြောပါတယ်။
“အုမ္မတီးဘက်မှာက တိုက်ပွဲတွေ နေတိုင်းဖြစ်နေတယ်။ မနေ့ လေယာဥ်နဲ့ လာပစ်သွားတာ။ အိမ်အချို့ ပျက်စီးတာ ရှိတယ်။ ရွာထဲမှာက ဒေသခံတွေ မနေကြတော့ဘူး။ ရှောင်ကုန်ကြပြီ” လို့ ဆိုပါတယ်။
စစ်ကောင်စီရဲ့ အမြောက်တပ်တွေ နောင်ချိုမြို့နယ် တောင်ခမ်းကျေးရွာအနီးရှိ တောင်ရှည်နဲ့ မန်မော်ကျေးရွာကြားမှာရှိတဲ့ TNLA က ၎င်းတို့ လက်လွတ်ထားရတဲ့ ဆယ်တောင်ပြည့်ကုန်းကို ထိုးစစ်ဆင်နေပြီး တိုက်ပွဲတွေ ပြင်းထန်နေတယ်လို့ သိရပါတယ်။
တရုတ်ရဲ့ ကြားဝင်စေ့စပ်မှုကြောင့် စစ်ကောင်စီနဲ့ TNLA အကြား ဆွေးနွေးပွဲရလဒ်မထွက်ဘဲ ပြီးဆုံးပြီးနောက် စစ်ကောင်စီတပ်ဟာ TNLA ထိန်းချုပ်ဒေသကို ထိုးစစ်ဆင်မှုတွေ ပြုလုပ်နေသလို လေကြောင်းတိုက်ခိုက်မှုတွေလည်း နေ့စဥ်လိုလို ပြုလုပ်နေတာ ဖြစ်ပါတယ်။
ပြီးခဲ့တဲ့ ၁၇ ရက်ကနေ မနေ့ ဖေဖော်ဝါရီ ၂၂ ရက်အထိ TNLA ထိန်းချုပ်ထားတဲ့ နမ္မတူ၊ နောင်ချိုနဲ့ မိုးမိတ်မြို့နယ် တွေမှာ စစ်ကောင်စီရဲ့ လေကြောင်းတိုက်ခိုက်မှုကြောင့် သေဆုံးသူ ၇ ဦးနဲ့ ဒဏ်ရာရသူ ၁၈ ဦးအထိ ရှိခဲ့ပါတယ်။
