ရွှေဖီမြေ၊ ဖေဖော်ဝါရီ ၂၄ ရက်၊ လားရှိုး
ကိုးကန့်တပ်- MNDAA ထိန်းချုပ်ထားတဲ့ လားရှိုးမြို့က စစ်ရှောင်ရဲ့ နေအိမ်တွေကို MNDAA က သိမ်းယူပြီး အိမ်ငှားအဖြစ် ပြန်ငှားနေတယ်ဆိုတဲ့ သတင်းအမှား လူမှုကွန်ရက်မှာ ပျံ့နှံ့နေပါတယ်။
စစ်ကောင်စီရဲ့ သတင်းတွေကိုသာ ရေးသားဖော်ပြနေတဲ့ Follower ၅၀၀ ကျော်ရှိတဲ့ Facebook page တစ်ခုဖြစ်တဲ့ Crystal queen က ပြီးခဲ့တဲ့ ဖေဖော်ဝါရီ ၁၂ ရက်က ရေးသားဖော်ပြထားတာကို တွေ့ရပြီး အဲဒီသတင်းကို နှစ်သက်သူ(Like) ၂၂ ခုနဲ့ ပြန်လည် မျှဝေသူ(Share) ၁၉ ခု ရှိပါတယ်။
“မြို့ထဲ ပြန်မလာနိုင်တဲ့ စစ်ရှောင်ဒေသခံတွေရဲ့ အိမ်ကြီး အိမ်ကောင်းတွေကို ရောင်းစားထားတာ။ အိမ်စောင့်တွေကိုလည်း ခြိမ်းခြောက်တာ ရှိတယ်။ အိမ်ရှင် ပြန်မလာရင် အိမ်တွေ သိမ်းမယ်လို့ တကန့်လိုတွေက ပြောတယ်” ဆိုပြီး ရေးသားဖော်ပြထားတာ ဖြစ်ပါတယ်။
အပြည့်အစုံကို ဒီ Archive link- https://archive.ph/WoPSV/image မှာ ဝင်ရောက် ဖတ်ရှုနိုင်ပါတယ်။
အဲဒီရေးသားဖော်ပြချက်နဲ့ ပတ်သက်ပြီး ရွှေဖီမြေရဲ့ အချက်အလက် စစ်ဆေးတဲ့အဖွဲ့က စိစစ်ကြည့်ရာမှာ မှားယွင်းတင်ဆက်တဲ့ အကြောင်းအရာတွေသာ ဖြစ်ကြောင်း တွေ့ရပါတယ်။
#သတင်းအမှားဖြစ်ကြောင်း စစ်ဆေးအတည်ပြုချက်
လက်ရှိ လားရှိုးမြို့ထဲ ရှိနေတဲ့ ဒေသခံနဲ့ ကိုးကန့်တပ်ဖက်က တာဝန်ရှိသူကို ရွှေဖီမြေက ဆက်သွယ်မေးမြန်းရာမှာ မသိရှိရကြောင်းနဲ့ အဲလိုဖြစ်စဉ်မျိုး လုပ်ဆောင်တာ မရှိကြောင်း တုန့်ပြန်ထားကြပါတယ်။
“အဲလို စစ်ရှောင်အိမ်တွေကို သိမ်းတာ မရှိပါဘူး။ ဗိုလ်ကြီး၊ စစ်အရာရှိတွေရဲ့ အိမ်တွေကိုတော့ ပြန်အငှားလုပ်တာတော့ ကြားတယ်” ဆိုပြီး ရွှေဖီမြေရဲ့ မေးမြန်းချက်ကို လားရှိုးမြို့နေ အမျိုးသမီးတစ်ဦးက အခုလို ပြန်ပြောတာပါ။
MNDAA ရဲ့ လားရှိုး ပြန်လည်ထူထောင်ရေးမှ တာဝန်ရှိသူတစ်ဦးကလည်း “ကျနော်တို့ အဲလိုလုပ်ရပ်မျိုး လုပ်ဆောင်တာ မရှိပါဘူး။ သတင်းအမှားသာ ဖြစ်တယ်” ဆိုပြီး ရွှေဖီမြေကို ဖြေဆိုထားပါတယ်။
ဒါ့အပြင် ဒေသတွင်းက သတင်းဌာနတွေအပြင် တခြားသော လွတ်လတ်တဲ့ သတင်းဌာနကြီးမှာလည်း အဲဒီသတင်းပါ အကြောင်းအရာနဲ့ ပတ်သက်ပြီး ရေးသားဖော်ပြတာကို မတွေ့ရပါဘူး။
ဒါ့ကြောင့် Crystal queen ဆိုတဲ့ Facebook page မှ ရေးသားတင်ဆက်ထားတဲ့ အကြောင်းအရာတွေမှာ မှားယွင်းတင်ဆက်တဲ့ သတင်းအကြောင်းအရာသာ ဖြစ်ပါတယ်။
စစ်ကောင်စီက နိုင်ငံတဝှမ်းမှာ စစ်ရေး ရှုံးနိမ့်မှု ကြုံလာတာနဲ့အမျှ စစ်ကောင်စီ ထောက်ခံသူတွေကလည်း သတင်းအမှားကို ရည်ရွယ်ချက်ရှိရှိ နည်းအမျိုးမျိုးနဲ့ ဆိုရှယ်ပလက်ဖောင်းမှာ ပုံဖော်ရေးသား ဖြန့်ဝေလာတာ တွေ့ရပါတယ်။
၎င်းတို့ ဖြန့်ချိနေတဲ့ သတင်းတု သတင်းအမှားတွေကို Myanmar Fcat-checking Network- MFCN ရဲ့ အဖွဲ့ဝင်တွေက အချက်အလက် စစ်ဆေးထားပြီး ဝင်ရောက်ဖတ်ရှုလိုပါက MFCN ရဲ့ Facebook page https://www.facebook.com/share/1Kc7vhuUAs/?mibextid=wwXIfr မှာ ဝင်ရောက် ဖတ်ရှုနိုင်ပါတယ်။
တရုတ်ရဲ့ ကြားဝင်စေ့စပ်မှုနဲ့ စစ်ကောင်စီနဲ့ MNDAA တို့ အပစ်ရပ်ပြီး ကိုးကန့်တပ်အနေနဲ့လည်း လားရှိုးမြို့ကနေ ဇွန်လ နောက်ဆုံးထားပြီး ဆုတ်ခွာပေးရမယ်ဆိုတဲ့သတင်း ထွက်ပေါ်ပြီးနောက်ပိုင်း စစ်ကောင်စီထောက်ခံသူတွေက လားရှိုးနဲ့ ပတ်သက်တဲ့ သတင်းတု၊ သတင်းအမှားတွေကို ချန်နယ်ပေါင်းစုံကနေ ဖြန့်ဝေလာကြတာ ဖြစ်ပါတယ်။
ဒါ့ကြောင့် ရွှေဖီမြေရဲ့ စာဖတ်ပရိသတ်တွေအနေနဲ့ အွန်လိုင်းပေါ်မှာ တက်လာတဲ့ သတင်းတိုင်းကို အလွယ်တကူ မယုံကြဘဲ လွတ်လပ်ပြီး အမှီအခိုကင်းတဲ့ သတင်းဌာနတွေ ရေးသားတင်ဆက်ထားတဲ့ သတင်းကိုသာ ရှာဖွေဖတ်ရှုကြဖို့ အကြံပြု တိုက်တွန်းလိုက်ပါတယ်။
