ပျားကြီး၊ ဖေဖော်ဝါရီ ၂၄ ရက်၊ ပြင်ဦးလွင်
မန္တလေးတိုင်း ပြင်ဦးလွင်မြို့ ရပ်ကွက်ကြီး ၁၂ ရေချမ်းအိုးရွာက နေအိမ်ပေါင်း ၁ ထောင်နီးပါးကို စစ်ကောင်စီတပ်က ဒီနေ့မနက်ပိုင်းမှာ စက်ယန္တရားကြီး အသုံးပြုပြီး အင်အားသုံး ဖြိုဖျက်နေတယ်လို့ ဒေသခံတွေက ပြောပါတယ်။
မြေဧက ၂၀၀ ကျော်ရှိပြီး ပြင်ဦးလွင်မြို့ရှောင်လမ်းအနီးက အချက်အချာကျတဲ့ ရေချမ်းအိုးရွာကို အာဏာသိမ်း စစ်ခေါင်းဆောင် မင်းအောင်လှိုင်ရဲ့ သားဖြစ်သူ အောင်ပြည့်စုံက သိမ်းယူဖို့ လုပ်ဆောင်နေတာ ဖြစ်ပါတယ်။
“လွယ်လွယ်နဲ့ ဝယ်ထားရတာ မဟုတ်ဘူးဗျ။ အခြားနည်းသုံးစွဲခွင့် ကျထားပြီးသားမြေတွေ ပါတယ်။ တချို့ဆို ဂရန်ပါ ရထားပြီးပြီ။ အဲဒါကို အဓမ္မ သိမ်းချင်နေတာ။ မျိုးအောင် (စစ်ကောင်စီခန့် လက်ရှိ မန္တလေးတိုင်း ဝန်ကြီးချုပ်)ကိုယ်တိုင် ဦးစီးပြီး ဘူဒိုဇာနဲ့ ထိုးနေတာပဲ” လို့ နေအိမ် ဖြိုဖျက်ခံခဲ့ရသူ ဒေသခံတစ်ဦးက ပြောပါတယ်။
လူဦးရေ ၃ သောင်းကျော် နေထိုင်တဲ့ ရေချမ်းအိုးရွာကို ၂၀၀၀ ပြည့်နှစ်ကစပြီး စစ်တပ်ပိုင်မြေအဖြစ် သတ်မှတ်သိမ်းယူခဲ့ပေမဲ့ NLD အစိုးရလက်ထက်မှာ ဒေသခံတွေရဲ့ ပိုင်ဆိုင်မှု အထောက်အထားအစုံအလင်နဲ့ တင်ပြနိုင်ခဲ့မှုကြောင့် သိမ်းယူနိုင်မှု မရှိခဲ့ဘဲ အာဏာသိမ်းပြီးနောက် ထင်ရာစိုင်းပြီး ပြန်လည် သိမ်းယူဖို့ လုပ်ဆောင်လာတာလို့ ဒေသခံတွေက ဆိုပါတယ်။
လက်ရှိ ဖြိုဖျက်ခံရမှုဟာ အာဏာသိမ်းပြီး နောက်ပိုင်း ၄ ကြိမ်မြောက် လာရောက်လုပ်ဆောင်မှုဖြစ်ပြီး ပြီးခဲ့တဲ့ ၂၀၂၄ ခုနှစ်အတွင်းမှာ ၃ ကြိမ် လာရောက် ဖြိုဖျက်မှု ပြုလုပ်ခဲ့သေးတယ်လို့ သိရပါတယ်။
ဖြိုဖျက်ဖို့ မှင်နီတား သတ်မှတ်ထားတဲ့ နေရာတွေဟာ မန္တလေး-လားရှိုး ကားလမ်းမနဲ့ မြို့ရှောင်လမ်းကြားမှာရှိပြီး အချက်အချာ ကျတာကြောင့် စစ်ခေါင်းဆောင်ရဲ့ သားဖြစ်သူက သိမ်းယူဖို့အပြင်းအထန် ကြိုးပမ်းနေတာ ဖြစ်ပါတယ်။
