ပို့လဘား၊ ဖေဖော်ဝါရီ ၂၁ ရက်၊ နောင်ချို
ရှမ်းမြောက် နောင်ချိုမြို့မှာ စစ်ကောင်စီတပ်က ဒရုန်းနဲ့ ဗုံး ထပ်မံ ကြဲချတိုက်ခိုက်ခဲ့တာကြောင့် ဘုန်းကြီးကျောင်းဆောင် မီးလောင်ပျက်စီးခဲ့တယ်လို့ ဖြစ်စဉ်သိရှိသူတစ်ဦးက ရွှေဖီမြေကို ပြောပါတယ်။
ဒီနေ့ ဖေဖော်ဝါရီ ၂၁ ရက် မနက် ၁ဝ နာရီခွဲမှာ နောင်ချိုမြို့နယ် အုမ္မသီးရွာကို စစ်တပ်က ဒရုန်းနဲ့ ဗုံး ၄ လုံး ကြဲချတိုက်ခိုက်ခဲ့တယ်လို့ ပြောပါတယ်။
“ဒရုန်းက တစ်ခါ လာတာနဲ့ ဗုံး ၃ လုံး ၄ လုံးလာချတာ။ ဘုန်းကြီးကျောင်းလည်း မီးလောင်သွားတာပေါ့။ လူထိခိုက်တာတော့ မရှိဘူး။ သူတို့ တစ်ခါနှစ်ခါ ဒရုန်းနဲ့ လာလာချနေတာ ဖြစ်တယ်”
အလားတူ နောင်ချိုမြို့နယ် ဘန့်ဘွေးရွာကနေ ဆမ္မဆယ်ရွာဘက်ကိုလည်း စစ်တပ်က လက်နက်ကြီး ပစ်ခတ်လို့ နေအိမ် ၃ လုံး ပျက်စီးခဲ့တယ်လို့ ဆိုပါတယ်။
တရုတ်နိုင်ငံ ကူမင်းမြို့က ဆွေးနွေးပွဲအပြီး စစ်တပ်က တအာင်းတပ်မတော်- TNLA ထိန်းချုပ်ထားတဲ့ ဒေသတွေကို နေ့စဉ်လိုလို ဆက်တိုက် ဗုံးကြဲတိုက်ခိုက်နေပါတယ်။
မနေ့ ဖေဖော်ဝါရီ ၂၀ ရက် ည ၉ နာရီခွဲမှာလည်း နောင်ချိုမြို့နယ် လောက်ဖန်းရွာကို ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် အဖွားအို ၁ ဦး သေဆုံးပြီး ကလေးတစ်ယောက်အပါအဝင် ၄ ဦး ဒဏ်ရာ ရရှိခဲ့သလို ၁၈ ရက်တုန်းကလည်း နောင်ချိုမြို့ပေါ်က ဆေးရုံနဲ့ ရဲစခန်းကို ဗုံးကြဲချခဲ့လို့ ၃ ဦး သေဆုံးခဲ့ပါတယ်။
