ပို့လဘား၊ ဖေဖော်ဝါရီ ၂၁ ရက်၊ နောင်ချို
ရှမ်းမြောက် နောင်ချိုမြို့မှာ စစ်ကောင်စီတပ်က ဂျက်ဖိုက်တာ လေယာဉ်နဲ့ ဗုံးကြဲတိုက်ခိုက်တာကြောင့် အဘွားအို ၁ ဦး သေဆုံးပြီး ကလေးငယ်တစ်ယောက်အပါအဝင် ၄ ဦး ဒဏ်ရာ ရရှိခဲ့တယ်လို့ ဒေသခံတစ်ဦးက ရွှေဖီမြေကို ပြောပါတယ်။
မနေ့ ဖေဖော်ဝါရီ ၂၀ ရက် ည ၉ နာရီခွဲမှာ နောင်ချိုမြို့နယ် လောက်ဖန်းရွာကို ဂျက်ဖိုက်တာနဲ့ ဗုံး ၂ လုံး လာရောက် ကြဲချတိုက်ခိုက်ခဲ့တာလို့ ဆိုပါတယ်။
“ဂျက်နဲ့ ၂ လုံး လာချတာ။ ဘေးရွာတွေရောပဲ။ ပေါင် ၅၀၀ အလုံးက မပေါက်ကွဲလို့ပေါ့။ အဖွားကြီးတစ်ယောက်ကတော့ ထိပြီး ပွဲချင်း သေတယ်”
တရုတ်နိုင်ငံ ကူမင်းမြို့က ဆွေးနွေးပွဲအပြီးမှာ စစ်တပ်က တအာင်းတပ်မတော်- TNLA ထိန်းချုပ်ထားတဲ့ ဒေသတွေကို နေ့စဉ်လိုလို ဆက်တိုက် ဗုံးကြဲတိုက်ခိုက်နေပါတယ်။
ပြီးခဲ့တဲ့ ဖေဖော်ဝါရီ ၁၉ ရက် ည ၈ နာရီကျော်မှာ နောင်ချိုမြို့မှာရှိတဲ့ ဘူတာရပ်ကွက်နဲ့ ပြည်သူ့ဆေးရုံပေါ် ဗုံး ၂ လုံး လာရောက် ကြဲချတိုက်ခိုက်ခဲ့လို့ ၃ ဦး သေဆုံးပြီး ၄ ဦး ထိခိုက်ဒဏ်ရာ ရရှိခဲ့ပါတယ်။
