ရွှေဖီမြေ၊ ဖေဖော်ဝါရီ ၂၀ ရက်၊ နောင်ချို
တအာင်းတပ် ထိန်းချုပ်ထားတဲ့ နောင်ချိုမြို့ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်မှုကြောင့် ၃ ဦး သေဆုံးပြီး ၄ ဦး ထိခိုက်ဒဏ်ရာ ရရှိခဲ့တယ်လို့ တအာင်းတပ်မတော်- PSLF/TNLA က ထုတ်ပြန်ထားပါတယ်။
မနေ့ ဖေဖော်ဝါရီ ၁၉ ရက် ည ၈ နာရီကျော်မှာ နောင်ချိုမြို့ရှိ ဘူတာရပ်ကွက်နဲ့ ပြည်သူ့ဆေးရုံပေါ် ဗုံး ၂ လုံး လာရောက် ကြဲချတိုက်ခိုက်ခဲ့တာ ဖြစ်ပါတယ်။
တရုတ်နိုင်ငံ ကူမင်းမြို့က ဆွေးနွေးပွဲမှာ စစ်ကောင်စီနဲ့ TNLA တို့ နှစ်ဖက်တောင်းဆိုမှု အပြန်အလှန် ပြုလုပ်ခဲ့ကြပြီး ဆက်လက်ဆွေးနွေးဖို့ ခက်ခဲလာတဲ့အတွက် ဖေဖော်ဝါရီ ၁၇ ရက် ညနေပိုင်းမှာ ဆွေးနွေးပွဲ ပြီးဆုံးသွားခဲ့ပြီးနောက် တအာင်းတပ် ထိန်းချုပ်တဲ့ မြို့ကို ထပ်မံ ဗုံးကြဲတိုက်ခိုက်ခဲ့တာ ဖြစ်ပါတယ်။
ဆွေးနွေးပွဲ ပြုလုပ်နေစဉ် ဖေဖော်ဝါရီ ၁၇ ရက်ကလည်း နောင်ချိုနဲ့ နမ္မတူမြို့ကို စစ်တပ်က လေကြောင်းကနေ ဗုံးကြဲတိုက်ခိုက်ခဲ့ပါတယ်။
စစ်တပ်ဟာ တိုက်ပွဲ ဖြစ်ပွားခြင်းမရှိဘဲ အရပ်သားတွေကို ရည်ရွယ်ချက်ရှိရှိ ဦးတည် ဗုံးကြဲတိုက်ခိုက်နေတာဖြစ်ပြီး လူထုတွေအနေနဲ့ ဗုံးကြဲတိုက်ခိုက်မှု ရှောင်ရှားနိုင်ဖို့က စစ်ရေးသတိ အမြဲရှိဖို့ လိုအပ်ပြီး လေကြောင်းရန်ကနေ ကာကွယ်နိုင်ဖို့၊ လေကြောင်းရန် ကာကွယ်ရေးဆိုင်ရာ နည်းလမ်း လိုက်နာဆောင်ရွက်ဖို့ လိုအပ်တယ်လို့လည်း သတိပေးထားပါတယ်။
ပြီးခဲ့တဲ့ ဖေဖော်ဝါရီ ၆ ရက်ကလည်း နောင်ချိုမြို့ သပြေတောင် ဘုရားကုန်းပေါ်မှာ လေကြောင်းကနေ ဗုံးကြဲတိုက်ခိုက်မှုကြောင့် ဒေသခံ ၁ ဦး ထိခိုက်ဒဏ်ရာ ရရှိခဲ့ဖူးပါတယ်။
